Бір жылда 913 мыңға жуық қазақстандық жұмысқа орналасты

Уәкілетті органның хабарлауынша, субсидияланатын жұмыс орындарына 171,8 мың адам жұмысқа орналастырылған. Оның ішінде 13,5 мың азамат әлеуметтік жұмыс орындарын алды, 30,6 мыңы жастар тәжірибесінен өтті, 100,8 мыңы қоғамдық жұмыстарға тартылды. "Күміс жас" жобалары аясында 19,4 мың адам, "бірінші жұмыс орны" — 7,1 мың адам, "Ұрпақтар келісімшарты" — 335 адам жұмысқа орналасты.

Халықтың әлеуметтік осал топтары арасында кәсіпкерлік белсенділікті қолдау үшін жаңа бизнес-бастамаларды іске асыруға 9 239 грант берілді. Әрбір гранттың мөлшері 400 АЕК-ке дейін немесе 1 572 800 теңгені құрады.

Еңбек нарығында сұранысқа ие дағдылар бойынша Онлайн-оқытумен 63,5 мың жұмыссыз қамтылды, оның ішінде 56,6 мыңы оқуды сәтті аяқтап, сертификаттар алды. "Бастау Бизнес" жобасы бойынша кәсіпкерлік негіздеріне 52 мың адам оқытылды, бұл ретте 29,3 мың адам сертификаттар алумен оқуды аяқтады.

Жұмыс берушілердің сұрауы бойынша кәсіптік оқытуға 9 734 адам жіберілді. Оқуды 8 535 азамат аяқтады, оның 7 442-сі жұмысқа орналастырылды.

Сонымен қатар, мансап орталықтарында 387 мың адам әлеуметтік кәсіптік бағдар мен консультациялық қызметтер алды.

Ведомство азаматтарды жұмысқа орналастыру бірнеше бағыт бойынша жүзеге асырылатынын және міндетті зейнетақы жарналарының аударылуымен расталатынын атап өтті. Атап айтқанда, 2025 жылы жұмыспен қамтуға жәрдемдесудің белсенді шаралары шеңберінде 181 мың адам, электрондық еңбек биржасы арқылы бос жұмыс орындарына — 254,1 мың адам, Президенттің "10 мың тұрғынға 100 жұмыс орны" бастамасы бойынша — 434 мың адам, ал орталық мемлекеттік органдардың жобалары шеңберінде — 43,7 мың адам жұмысқа орналастырылды.