Қазақстандықтар бір жыл ішінде сумен жабдықтау сапасына 70 мың шағым түсірді

"Өңірлердің тұрғындарынан ауыз судың сапасына, берудің үзілуіне, сумен жабдықтау желілерінің тозуына, жөндеу және пайдалануға беру мерзімдерінің кешіктірілуіне үнемі шағымдар келіп түседі. Жақында Орал, Теміртау тұрғындарының су сапасына қатысты шағымдары тіркелді. Жалпы, өткен жылы мемлекеттік органдарға сумен жабдықтау мәселелері бойынша тұрғындардан 70 мыңға жуық шағым түсті. Бұл өңірлердің әкімдіктерімен мердігерлік және қызмет көрсететін ұйымдармен жұмыс тиісті деңгейде жүргізілмейтіндігін айғақтайды. Жаңа сумен жабдықтау және су бұру желілеріне тиісінше қызмет көрсету жөнінде шаралар қабылданбайды, сондай – ақ ауыз су сапасының нормалары сақталмайды",-деді Премьер-министр Олжас Бектенов Үкімет отырысында.

Осыған байланысты, оның айтуынша, әкімдіктер әрбір өтініш бойынша тексеру жүргізіп, жосықсыз ұйымдарға қатысты қатаң шаралар қабылдауы қажет.

Ол ҚР халқы санының өсуін және экономиканың дамуын ескере отырып, елде су тұтыну ұлғаятынын атап өтті. Сондықтан таза ауыз суға қол жеткізуді қамтамасыз ету мәселесі күн сайын өзекті бола түседі.

"Болжам бойынша, 2026 жылдың вегетациялық кезеңіне су ағыны 1 млрд текше метрге дейін тапшылықпен бағаланады. Ағымдағы жылдың соңына дейін жер үсті және жер асты көздері туралы деректерді біріктіретін су ресурстарының бірыңғай цифрлық платформасын құру қажет. Бұл жобаны іске асыру ұлттық су балансының картасын жасауға және гидрогеологиялық мониторингті қамтамасыз етуге мүмкіндік береді. Сонымен қатар, суару арналарын цифрландыру бойынша жұмысты жалғастыру қажет. Суды көзден соңғы тұтынушыға дейін толық бақылауды қамтамасыз ету қажет. Барлық жұмыс сапалы және мерзімінде жүргізілуі тиіс", - деп атап өтті премьер.

Сонымен қатар, ол өнеркәсіп және құрылыс министрлігіне әкімдіктермен бірлесіп сумен жабдықтау және су бұру жөніндегі жобалардың іске асырылуына тұрақты бақылауды жүзеге асыруды тапсырды.

"Меморандумдар жасау уақыты өтті, су секторындағы жобаларды іс жүзінде іске асыруға көшетін кез келді. Су министрлігі жыл соңына дейін 142 ауылдық елді мекенді ауыз сумен қамтамасыз етуді жақсарту бойынша 12 жобаны іске асыру жөнінде шаралар қабылдасын. 30 шілдеге дейін Түркістан облысында Шардара топтық су құбырын пайдалануға беруді қамтамасыз ету. 15 қарашаға дейін СҚО-да Пресновск және Соколов топтық су құбырларын реконструкциялауды аяқтау. Су министрлігі егіс алқаптарының құрылымын әртараптандыру жөніндегі Жол картасының индикаторларына сәйкес фермерлерге су беру бойынша барлық шарттардың жасалуын қамтамасыз етсін", – деп атап өтті Бектенов.

Ол жас кезінен бастап қазақстандықтар арасында су ресурстарын ұтымды пайдалану мәдениетін қалыптастыру бойынша жүйелі жұмысты жалғастыруды тапсырды.