Қазақстанда сайлау туралы заң өзгереді

Мәжіліс депутаты Снежанна Имашеваның айтуынша, мақсат - сайлау тәжірибесін ескере отырып, заңнаманың жекелеген ережелерін түзету, сондай-ақ сайлау жүйесін жетілдіру. Конституциялық заң жобасы мен екі ілеспе заң жобасын Үкімет әзірледі.

"Олар сайлау кезіндегі рәсімдік мәселелерді жетілдіруге, Президенттікке, Парламент, мәслихат депутаттығына, әкімдерге, сондай - ақ сайлау комиссияларының мүшелеріне қойылатын талаптарды күшейтуге, үгіт, білім беру және әкімге кандидаттың сайлау қорын пайдалану мәселелерін реттеуге бағытталған", - деп хабарлады Имашева.

Атап айтқанда, депутаттың айтуынша, сыбайлас жемқорлық, ауыр және аса ауыр қылмыстар үшін сотталған адамдар сайлау комиссияларының мүшесі бола алмайды. Сондай-ақ әкімшілік-аумақтық бірліктерді қайта құру кезінде сайлау комиссиялары мен олардың мүшелерінің өкілеттіктерін ауыстыру немесе сақтау мәселелерін реттейді.

"Аумақтық сайлау комиссиясы мүшесінің бала күтімі бойынша демалыста, оқу демалысында болу және оның орнына сайлау комиссиясының уақытша мүшесін тағайындау кезеңіне өкілеттігін тоқтата тұруға мүмкіндік беріледі. Кандидаттың сайлау қорларынан басқа қаржыландыруды тартуына тыйым салу және осы талапты бұзғаны үшін жауапкершілік бекітіледі", - деп толықтырды Снежанна Имашева.

Сонымен бірге сайлау комиссиялары мүшелерінің өз өкілеттіктерін асыра пайдаланғаны және заңды бұзғаны үшін жауапкершілігі белгіленеді. Бақылаушылар үшін жас шегі нақтыланады. Олар тек 18 жасқа толған Қазақстан азаматтары бола алады.

Сондай-ақ, егер кандидаттар бірдей дауыс санын жинаса, әкімдерді таңдау кезінде қайта дауыс беру мәселелерін регламенттеу ұсынылады.

Бүгін Мәжілістің жалпы отырысында депутаттарды Парламент палаталарының арнайы комиссиясына қосу қаралады.

Заң бойынша Парламенттегі барлық конституциялық заңдарды екі Палатаның депутаттары қарайды.