ҚР ғылым министрлігі әкімдіктерді жоғары оқу орындарын техникамен жарақтандыру үшін қаржыландыруды тартуға шақырады

ҚР Ғылым және жоғары білім министрі Саясат Нұрбек 6 қаңтарда Үкімет отырысында жоғары оқу орындарын компьютерлік техникамен жарақтандыру үшін қаржыландыруды тарту бойынша әкімдіктерге қосымша тапсырма беру қажеттігі туралы хабарлады, деп хабарлайды kazinform агенттігінің тілшісі.

Оның айтуынша, ҚР жасанды интеллект және цифрлық даму министрлігімен және Astana Hub-пен бірлесіп университеттер базасында Tomorrow School жобасы іске асырылуда.

"Жоба халықаралық әдіснама негізінде барлық өңірлердің тұрғындары үшін тәулік бойы қолжетімділік форматында ұйымдастырылады. Бүгінгі таңда 4 өңірде қажетті оқу үй-жайлары бөлініп, жобаны іске асыру үшін компьютерлік техникамен қамтамасыз ету мәселелері толығымен шешілді. Осыған байланысты жобаны белсенді қолдағаны үшін Ақмола, Қостанай және Алматы облыстарының әкімдіктеріне алғысымызды білдіреміз. Қалған 15 өңірде компьютерлік техникамен қамтамасыз ету мәселелері пысықталуда", - деп атап өтті Саясат Нұрбек.

Осыған байланысты министр жоғары оқу орындарын компьютерлік техникамен жарақтандыру үшін қаржыландыруды тарту бойынша өңірлердің әкімдіктеріне қосымша тапсырма беруді сұрады.

Сондай-ақ, Саясат Нұрбек Қазақстанда 100 мың студент АИ бойынша тереңдетілген курстардан өтетінін айтты.