Тоқаев сыбайлас жемқорлыққа қарсы заңдарға енгізілген өзгерістерді бекітті

Құжатты Ақорда жариялады.

"Мемлекет басшысы "Қазақстан Республикасының кейбір заңнамалық актілеріне Қазақстан Республикасы Конституциялық сотының шешімдерін орындау және заңсыз сатып алынған активтерді мемлекетке қайтару мәселелері бойынша өзгерістер мен толықтырулар енгізу туралы" Қазақстан Республикасының Заңына қол қойды", – делінген хабарламада.

Бұған дейін Сенат депутаттары Конституциялық соттың шешімдерін орындау және заңсыз сатып алынған активтерді мемлекетке қайтару мәселелері бойынша заңды екінші оқылымда мақұлдаған болатын.

Жарияланған ақпаратқа сәйкес, сыбайлас жемқорлыққа қарсы іс-қимыл, Мемлекеттік қызмет, заңсыз сатып алынған активтерді мемлекетке қайтару, жер пайдалану құқықтарын мұрагерлікке алу, сондай-ақ алименттік міндеттемелерді орындау мәселелерін реттейтін бірқатар заңнамалық актілерге түзетулер енгізіледі.

Заңда мемлекеттік функцияларды орындауға уәкілеттік берілген адамдарға теңестірілген адамдар үшін кәсіпкерлік және өзге де ақылы қызметпен айналысуға жалпы тыйымның күшін жою ұсынылады. Бұл ретте қолданыстағы нормативтік құқықтық актілерде белгіленген мынадай санаттар үшін шектеулер сақталады:

- өкілеттіктерін кәсіби тұрақты негізде жүзеге асыратын аумақтық сайлау комиссияларының мүшелері;
- Ұлттық банктің, Қаржы нарығын реттеу және дамыту агенттігінің және азаматтық авиация саласындағы уәкілетті ұйымның қызметшілері;
- ұлттық холдингтер мен ұлттық компаниялардың басқарушылары.

Қосымша Заңмен мемлекеттік функцияларды орындауға уәкілеттік берілген адамдарға теңестірілген адамдардың кәсіпкерлік қызметіне жол берілмейтін нақты негіздер енгізіледі, атап айтқанда:

- егер тиісті қызмет лауазымдық міндеттерді орындауға кедергі келтірсе;
- егер тиісті қызмет қызметтік мүлікті пайдалануға әкеп соқтырса;
- мүдделер қақтығысы болған жағдайда.