Қазақстандық ғалымдар тұқымдарды қорғау арқылы суды үнемдеудің жолын тапты

Әл-Фараби атындағы Қазақ ұлттық университетінің ғалымдары тұқымдарды биологиялық ыдырайтын модификацияланған полимерлермен жабу технологиясын әзірлеу арқылы ауыл шаруашылығында суды үнемдеудің тиімді әдісін тапты.

Зерттеу барысында мамандар ауылшаруашылық және жеміс дақылдарының тұқымдарын өңдеу үшін полимерлі гидрогельдерді, сазды, күріш қабығының күлін және крахмал ерітіндісін қолданды. Нәтижелер көрсеткендей, мұндай құраммен жабылған тұқымдар әдеттегіден әлдеқайда жақсы өнеді: көшеттер 7-8 күннен кейін пайда болады, ал олардың жапырақтары тығыздығы мен тұрақтылығымен ерекшеленеді.

Сонымен қатар, жабылған тұқымдар ылғалды едәуір көп ұстай алады, бұл жиі суару қажеттілігін азайтады — аптасына бір рет жеткілікті. Жоба жетекшісінің айтуынша, бұл әдіс аграрлық сектордағы су ресурстарын үнемдеудің тиімді құралы бола алады.

"Топырақтағы тұқымның өнуіне көптеген факторлар әсер етеді: жәндіктердің зақымдануы, стресстік жағдайлар немесе құрғақшылық. Біз әзірлеген ғылыми тәсіл барлық осы мәселелердің алдын алуға мүмкіндік береді. Зерттеу тобы рапс, қызанақ және қант қызылшасының тұқымымен жұмыс жасады. Арнайы жабдықтың көмегімен біз тұқымдарды саз, полимерлі гидрогельдер, күріш қабығының күлі мен крахмал ерітіндісінің қоспасымен қаптадық. Мұндай инновациялық жоба бұрын Қазақстанда іске асырылмаған, сондықтан біз осындай технологияны алғашқылардың бірі болып енгізіп отырмыз", - деп атап өтті жоба жетекшісі, қауымдастырылған профессор Райхан Рахметуллаева.

Бүгін ҚазҰУ ғалымдары инновациялық әзірлеуге патент алып, нәтижелерін жоғары рейтингті халықаралық журналдарда жариялады. Жобаға 10-нан астам зерттеуші қатысты.