Қазақстан су сапасы мен санитарлық қауіпсіздікті бақылауды күшейтуде

Құжат су ресурстарын басқару арқылы халықтың денсаулығы мен әл-ауқатын қорғауды қамтамасыз етуге, сондай-ақ сумен байланысты аурулардың таралуын болдырмауға бағытталған.

"Қазақстан үшін бұл хаттаманы ратификациялау бірнеше нақты артықшылықтар береді. Біріншіден, су сапасы мен санитарлық қауіпсіздікке қойылатын талаптар халықаралық деңгейде нақты бекітілетін болады. Бұл еліміздің су ресурстарын қорғауға, су арқылы берілетін аурулардың алдын алуға және халықтың денсаулық көрсеткіштерін жақсартуға мүмкіндік береді. Екіншіден, трансшекаралық өзендер мен көлдерді басқаруда көрші мемлекеттермен өзара іс-қимылды нығайтуға мүмкіндік туады. Үшіншіден, хаттама су инфрақұрылымын жаңғыртуға, мониторинг жүйесін дамытуға және ғылыми-техникалық ынтымақтастықты кеңейтуге жол ашады", - деді сенатор Сәкен Арубаев палатаның жалпы отырысында.

Хаттама бойынша елдердің негізгі міндеттемелері-сумен жабдықтау, санитария, гигиена және денсаулық сақтау бойынша нақты және өлшенетін нысаналы көрсеткіштерді белгілеу; сумен байланысты ауруларды қадағалау және оларды ерте ескерту жүйесін құру және жетілдіру; ТЖ іс-қимыл жоспарларын әзірлеу.

Бұдан басқа, елдер халықты қолданыстағы санитарлық-гигиеналық талаптарға жауап беретін сумен қамтамасыз ету бөлігінде ведомствоаралық өзара іс-қимылды күшейтуге; жұртшылықты шешімдер қабылдау процесіне тартуға және су шаруашылығы қызметінің барлық кезеңдерінде халықтың хабардар болуын арттыруға, сондай-ақ су ресурстарын қорғау және пайдалану, санитария және денсаулық сақтау саласындағы халықаралық ынтымақтастықты дамытуға міндетті.

Хаттаманың қолданылу аясы жер үсті тұщы суларына, жер асты суларына, сағаларға, аквамәдениет үшін пайдаланылатын жағалау суларына, шомылуға ашық тұйық суларға, қабылдау, тасымалдау, тазарту немесе жабдықтау процесіндегі суларға, ағынды суларға қолданылады.

Осы Хаттама шеңберінде Қазақстан Конвенцияның институционалдық құрылымына қосылады, қауіпсіз ауыз суды дайындау және жеткізу, сондай-ақ сарқынды суларды кәдеге жарату және қайта пайдалану саласындағы озық технологиялар мен білімдерге қол жеткізе алады, бірлескен қадағалау және ерте ескерту жүйелерін, Төтенше жағдайлар кезіндегі іс-қимыл жоспарларын әзірлеуге қатыса алады.