Полицейлер Қарағандыда жерасты зертханасын ашты

Сурет: polisia.kz

6 Қараша, 202510:02 polisia.kz

Қарағанды облысының полиция департаменті "Заң және тәртіп" қағидатын іске асыру шеңберінде өңір аумағында есірткінің заңсыз айналымына қарсы іс-қимыл бойынша жүйелі жұмысты жалғастыруда, деп хабарлайды Polisia.kz.

5 қарашада полиция департаментінің есірткі қылмысына қарсы іс-қимыл бөлімшесінің қызметкерлері облыс прокуратурасының көмегімен Қарағанды қаласының Сұрыптау кентінде ауқымды арнайы операция жүргізді. Жедел іс-шаралар барысында синтетикалық есірткі өндірісі бойынша жерасты зертханасын ұйымдастыруға күдікті Облыстың 28-30 жас аралығындағы екі тұрғыны анықталып, ұсталды.

Тақырып бойынша сілтемелер4 ҚарашаҚарағанды облысында есірткі сататын интернет-дүкен иесі ұсталды

Жалға алынған үйді тінту нәтижесінде полицейлер бір тоннадан астам прекурсорларды және 52 кг-нан астам дайын Альфа-PvP есірткі затын тауып, тәркіледі.

Сондай-ақ психотроптық заттарды өндіруге арналған жабдықтар: таразылар, араластырғыштар, кептіргіштер, вакууматорлар, контейнерлер және заңсыз қызметте пайдаланылатын өзге де заттар тәркіленді.

— Жүргізілген операция қара нарыққа шамамен 173 мың доза синтетикалық есірткі шығаруға жол бермеді. Сонымен қатар, қылмыстық қызметке жаңа қатысушыларды, оның ішінде азаматтық тұрғындар арасынан әлеуетті курьер-салымшыларды тартудың жолын кесу мүмкін болды, - деп хабарлады Қарағанды облысы ПД есірткі қылмысына қарсы іс-қимыл басқармасының бастығы Ғалымжан Бекболатов.

Алдын ала мәліметтер бойынша, күдіктілер зертхананы ұйымдастыру мақсатында үйді жалға алып, куратордың нұсқауы бойынша психотроптық заттар жасаған. Олар криптовалютада жұмыс істегені үшін сыйақы алды.

Осы факті бойынша қылмыстық іс қозғалды.

Күдіктілердің екеуі де уақытша ұстау изоляторына қамалды. Қазіргі уақытта сотқа дейінгі тергеу жалғасуда.