Балқаш көліндегі су жыл сайын ластануда-сарапшы

"Көпжылдық статистика көлге түсетін судың көлемі жыл сайын азайып бара жатқанын көрсетеді. Соңғы 20 жылда бұл көрсеткіш шамамен 18 текше шақырымнан 12 текше шақырымға дейін қысқарды. Әрине, бұл судың ластану деңгейіне тікелей әсер етеді. Өйткені судың көлемі мен сапасы бір – бірімен тығыз байланысты: көлем азайған сайын ластану деңгейі артады", - деді сарапшы.

Оның айтуынша, көлдің жағасында орналасқан кәсіпорындар да су қоймасының жағдайына тікелей әсер етеді.

"Көл жағасында еліміздің ірі кәсіпорындарының бірі – "Балқашмыс"орналасқан. Бұл зауыт жыл сайын ауаға 70 мың тоннадан астам зиянды заттарды шығарады. Олардың ішінде мыс, мырыш және басқа да улы элементтер бар. Зиянды әсер Балқашқа және оған құятын өзендер арқылы жетеді. Мысалы, көлге ауыл шаруашылығында қолданылатын түрлі тыңайтқыштар, пестицидтер, химиялық заттар, сондай – ақ елді мекендерден коммуналдық ағынды сулар зиян келтіреді", - деп атап өтті Б.Есекин.

Бұл ретте, ҚР Экология және табиғи ресурстар министрлігі көлдегі судың сапасын "орташа ластану"деп бағалайды.

"Зоо - және фитопланктон бойынша Балқаш көліндегі судың сапасы үшінші сыныпқа (орташа ластанған су) сәйкес келеді", - деп хабарлады ведомствоның Kazinform ресми сұрауына берген жауабында.

Б. Есекин көлдегі су сапасының төмендегенін көрсететін нақты мысал келтірді.

"Ластану деңгейінің өсуінің нақты дәлелі-Балқашта сирек кездесетін, тек осы аймақта тұратын эндемикалық балық түрлерінің жойылуы. Қазір көлде тек арам балық қалды. Бұл экожүйенің сыни күйде екендігінің айқын белгісі. Балқаш бүгінде жоғары қауіпті аймақта. Көлді сақтау үшін суды тұтынуды азайту, ластануды азайту және ең бастысы су көздерін қалпына келтірудің нақты шаралары қажет. Бірақ қолданыстағы мемлекеттік су және экологиялық бағдарламаларда мұндай жұмыстар қарастырылмаған", - деді сарапшы.