Қарағанды облысында заманауи жедел басқару орталығы ашылды

Орталықты құру "Заң және тәртіп" қағидатын іске асыруға және өңірдегі қоғамдық қауіпсіздік деңгейін арттыруға бағытталған. Іс-шараға Қарағанды облысы полиция департаментінің бастығы Негмет Исмағұлов және Саран қаласы әкімінің орынбасары қатысты.

Жұмыс сапарымен Қарағанды облысына ҚР Ішкі істер министрінің орынбасары Сәкен Сәрсенов келді.

Сапар барысында вице-министр Саран қаласына барып, қалалық полиция бөлімі жанындағы жаңа жедел басқару орталығының ашылу салтанатына қатысты.

- Құқықтық тәртіпті қамтамасыз етуде жасанды интеллект жүйесін дамыту-ішкі істер органдарының жұмысындағы негізгі бағыттардың бірі. Бұл технологиялардың құқық бұзушылықтың алдын алу және азаматтарды қорғау үшін тиімді пайдаланылуы маңызды, - деп атап өтті Сәкен Сәрсенов.

Жаңа орталық заманауи технологиялармен жабдықталған және қаладағы жағдайдың орталықтандырылған мониторингін қамтамасыз етеді. Қазіргі уақытта жүйеге қоғамдық орындарда орнатылған 613 бейнебақылау камерасы, сондай-ақ 24 білім беру мекемесінен 307 камера қосылған. Бақылау тәулік бойы жүзеге асырылады, бұл құқық бұзушылықтар мен төтенше жағдайларға жедел ден қоюға мүмкіндік береді.

Саран полиция бөлімі бастығының орынбасары Арман Ахметовтың айтуынша, орталық іске қосылған сәттен бастап 10 қылмыс ашылып, 5 мыңнан астам құқық бұзушылық анықталды.

— Полицейлер тәулік бойы оқу орындарындағы, өнеркәсіптік аймақтардағы және қоғамдық орындардағы жағдайды қадағалап отырады, бұл профилактикалық жұмыстың тиімділігін айтарлықтай арттырады, - деп атап өтті Ахметов.

Кездесуде сөз сөйлеген ішкі істер министрінің орынбасары қалалық полиция бөлімінің басшылығына бейнебақылау жүйесін кеңейтуді жалғастыруды және азаматтардың жаппай болатын орындарында жасанды интеллект элементтері бар зияткерлік камераларды енгізуді тапсырды.

Жұмыс сапары аясында Вице-министр Қарағанды облысы полиция департаментінің жедел басқару орталығында болып, облыс орталығындағы қауіпсіздікті қамтамасыз ету жүйесімен танысты. Сонымен қатар, ол полиция қызметін цифрландыру мәселелеріне арналған кеңес өткізді, онда құқық қорғау саласына цифрлық шешімдерді енгізудің нәтижелері мен перспективалары қаралды.

Кеңесті қорытындылай келе, Сәкен Сейітжаппарұлы полиция жұмысының тиімділігін арттыруда цифрлық технологиялардың маңыздылығын атап өтіп, өңір бөлімшелерінің алдына қауіпсіздік жүйелерін одан әрі жетілдіру бойынша нақты міндеттер қойды.