Қазақстанда Парламенттің 30 жылдығына арналған медаль тағайындалды

Медаль Қазақстан парламентаризмінің дамуына және қалыптасуына елеулі үлес қосқан ҚР азаматтары мен шетел азаматтарын көтермелеу үшін, сондай-ақ республика Парламентінің 30 жылдығына орай белгіленеді.

Сондай-ақ, "Қазақстан Республикасының Парламентіне 30 жыл"мерейтойлық медалімен марапаттау ережесі бекітілді.

Мерейтойлық медальмен наградтауға ұсыныстарды ҚР Президентіне Парламент палаталарының төрағалары, Үкімет, Конституциялық Сот, Жоғарғы Сот, министрліктер, республиканың өзге де орталық мемлекеттік органдары, Астана, Алматы, Шымкент қалаларының және облыстардың әкімдері, сондай-ақ қоғамдық бірлестіктер енгізеді.

Мерейтойлық медальді ҚР Президенті тапсырады.

Мерейтойлық медаль ҚР Президентінің атынан және оның тапсырмасы бойынша да табысталуы мүмкін:

- ҚР Мемлекеттік кеңесшісі;
- ҚР Парламенті палаталарының төрағалары;
- облыстардың, республикалық маңызы бар қалалардың және астананың әкімдері;
- ҚР Президенті уәкілеттік берген лауазымды тұлғалар.

Мерейтойлық медальді тапсыру салтанатты жағдайда жүргізіледі және наградталған адамға жеке тапсырылады. Тапсыру алдында ҚР Президентінің марапаттау туралы Жарлығы жарияланады.

Әрбір наградталған адамға мерейтойлық медаль тапсырумен бір мезгілде белгіленген үлгідегі куәлік беріледі.

Жарлық қол қойылған күнінен бастап қолданысқа енгізіледі.