Қазақстанның екі облысында орман қорынан жер ауылдық елді мекендерге берілді

"Қарағанды облысының Табиғи ресурстар және табиғат пайдалануды реттеу басқармасының" Қарағанды орман және жануарлар дүниесін қорғау жөніндегі шаруашылық" КММ орман қоры жерлерінің санатынан жалпы ауданы 73,9093 гектар жер учаскелері ауылдық елді мекендер жерлерінің санатына ауыстырылсын", – делінген құжатта.

Берілетін 73,9093 гектардың 61 гектары орманмен қамтылған, 12,9093 гектары жайылымдар.

Қарағанды облысының әкіміне Бұқар Жырау ауданының әкімдігіне ауылдық елді мекеннің шекарасының (шегінің) өзгеруіне байланысты жер учаскесін беруді қамтамасыз ету тапсырылды.

Бұқар Жырау ауданының әкімдігі орман шаруашылығын жүргізуге байланысты емес мақсаттарда пайдалану үшін орман алқаптарын алып қоюдан туындаған орман шаруашылығы өндірісінің шығындары мен залалдарын республикалық бюджет кірісіне өтеуі қажет, екпелер кесілген жағдайда алынған сүректі аталған мекеменің балансына бере отырып, алаңды тазарту жөнінде шаралар қабылдасын.

Қаулы қол қойылған күнінен бастап қолданысқа енгізіледі.

Сондай-ақ, Үкіметтің 2025 жылғы 8 қазандағы орман қоры жерлерінің жекелеген учаскелерін Ақмола облысындағы басқа санаттағы жерлерге ауыстыру туралы қаулысы қабылданды.

Жалпы ауданы 62,6 гектар жер учаскелері ҚР Экология және табиғи ресурстар министрлігі Орман шаруашылығы және жануарлар дүниесі комитетінің "Сандықтау оқу-өндірістік орман шаруашылығы" РММ орман қоры жерлерінің санатынан ауылдық елді мекендер жерлерінің санатына ауыстырылады.

Берілетін 62,6 га орманмен қамтылмағаны нақтыланды.

Осыған байланысты Ақмола облысының әкіміне ауылдық елді мекеннің шекараларының (шегінің) өзгеруіне байланысты Сандықтау ауданының әкімдігіне жер учаскесін беруді қамтамасыз ету тапсырылды.

Тиісінше, Сандықтау ауданының әкімдігі орман шаруашылығын жүргізуге байланысты емес мақсаттарда пайдалану үшін орман алқаптарын алып қоюдан туындаған орман шаруашылығы өндірісінің шығындарын республикалық бюджет кірісіне өтеуі қажет, екпелер кесілген жағдайда алынған сүректі аталған мекеменің балансына бере отырып, алаңды тазарту жөнінде шаралар қабылдасын.

Қаулы қол қойылған күнінен бастап қолданысқа енгізіледі.