Туризм және спорт министрлігі Қазақстандағы негізгі спорт түрлерінің тізімін анықтады

"Аталған спорт түрлерін қаржыландыру республикалық және жергілікті бюджеттер есебінен басым тәртіппен жүзеге асырылатын болады және спорт резервін дайындауға, спортшылардың халықаралық жарыстарға қатысуына, оқу-жаттығу жиындары мен спорттық іс — шараларды өткізуге, сондай-ақ спорттық инфрақұрылымды күтіп-ұстауға және дамытуға бағытталады", - делінген хабарламада.

Жоғары жетістіктегі спорттың 65 түрінің 46 басым түрі анықталды, олардың қатарына 11 ұлттық спорт түрі кірді. Іріктеудің негізгі критерийі-Қазақстан ұлттық құрамаларының Олимпиада, Паралимпиада, Сурдлимпиада, Азия және Параазия ойындарындағы нәтижелері.

Жоғары жетістіктер спортының тізіміне енбеген спорт түрлері бұқаралық спорт қағидаты бойынша дамитын болады. Жергілікті атқарушы органдар спортшылардың Қазақстан Республикасының аумағындағы ел чемпионаттарына және кешенді жарыстарға қатысуы үшін қаржыландыруды жоспарлайтын болады, халықаралық жарыстарға қатысу бюджеттен тыс және өзге де қаражат есебінен мүмкін болады.

Тізім жыл сайын жаңартылып отырады, бұл оған Олимпиада, Паралимпиада, Сурдлимпиада, Азия және Параазия ойындарының бағдарламасына енген спорт түрлерін қосуға мүмкіндік береді.

"Заң жобасына түзетулер жұртшылықтың, депутаттық корпустың, спорт саласы өкілдерінің, федерациялардың, жаттықтырушылардың, сарапшылар қауымдастығының, үкіметтік емес ұйымдардың пікірін ескере отырып енгізілгенін атап өту маңызды", — делінген хабарламада.