Қазақстанда қандай дәрігерлер жетіспейді-депутат дабыл қағуда

2024 жылдың қорытындысы бойынша еліміздегі дәрігерлердің тапшылығы 3954 маманды құрады. Бұл ретте орта медициналық персоналдың жетіспеушілігі 4505 адам деңгейінде сақталады.

"2025 жылғы 1 қаңтардағы жағдай бойынша еліміздің денсаулық сақтау жүйесінде 275 мыңға жуық медицина қызметкері жұмыс істейді, оның 83 мыңнан астамы – дәрігерлер, ал 191 мыңға жуығы – орта медицина қызметкерлері. Осыған қарамастан, Кадрлық теңгерімсіздік жалғасуда. Терапевттердің, жалпы практика дәрігерлерінің, педиатрлардың, акушер-гинекологтардың, хирургтардың және анестезиолог-реаниматологтардың жетіспеушілігі аса өткір сезіледі", - деді Тұрлыханов.
Ол 2025 жылдың бірінші жартыжылдығының қорытындысы бойынша Қостанай облысында кадр тапшылығы 326 маманды құрағанын атап өтті. Осындай проблемалар Ақмола, Жамбыл, Түркістан облыстарында, сондай-ақ дәрігерлермен қамтамасыз ету штат санының 75% - на әрең жететін ауылдық жерлердегі бірқатар аудандарда байқалады.

Саланы бюджеттік қаржыландырудың қысқаруы оған ерекше алаңдаушылық туғызады. Қолда бар ақпаратқа сәйкес, 2025 жылы денсаулық сақтау саласына 2 трлн теңге көзделген, ал 2024 жылы қаржыландыру 2,8 трлн теңгені құрады.

"Кадрлардың тұрақты тапшылығы, дәрігерлік құрамның қартаюы және бастапқы буынға жүктеменің өсуі денсаулық сақтауды дамыту жөніндегі ұлттық жобалар мен бағдарламаларды іске асыруды айтарлықтай баяулатуы мүмкін", – деп қосты депутат.

Ол денсаулық сақтау министрі Ақмарал Әлназароваға келесі мәселелерді қарастыруға жүгінді:

- кадрлар тапшылығы жоғары өңірлерде дәрігерлер мен орта медициналық персонал үшін мемлекеттік қолдау шараларын қабылдау-әлеуметтік жеңілдіктер, қызметтік тұрғын үй, көтерме төлемдер, нысаналы білім беру гранттарын беру, сондай-ақ тәлімгерлік және мамандарды қайта даярлау жүйесін дамыту;

- Денсаулық сақтау жүйесін қаржыландыру көлемін біртіндеп ұлғайту, атап айтқанда, медицина қызметкерлерін ынталандыруға, ауылдық жерлерде жұмыс істейтін мамандар үшін жалақыға қосымша коэффициенттерді енгізу және салалық бюджет құрылымында кадрлық даму шығыстарының үлесін ұлғайту;

- Қазақстан Республикасының денсаулық сақтауды дамытудың 2030 жылға дейінгі тұжырымдамасының жобасында кадрларды бөлудің тұрақты тетігін құру, сондай-ақ тұрғылықты жеріне қарамастан халықтың білікті медициналық көмекке қол жеткізуін қамтамасыз ететін мобильді медициналық бригадаларды дамыту көзделсін.