Тоқаев дербес деректердің ағып кетуі үшін жауапкершілікті қатаңдатуға шақырды

Президент Қасым-Жомарт Тоқаевтың төрағалығымен азаматтар үшін цифрлық ортаның киберқауіпсіздігі мен қорғалуын қамтамасыз ету мәселелеріне арналған Қазақстан Республикасы Қауіпсіздік Кеңесінің отырысы өтті.

Мемлекет басшысы жуырдағы Жолдауында Қазақстанды толыққанды цифрлық елге айналдыру міндетін қойғанын еске салды. Оның шешімі кешенді шараларды, соның ішінде киберқауіпсіздік саласында да қабылдауды талап етеді.

Отырыс барысында қазіргі заманғы киберқауіптер мен оларға қарсы іс-қимыл әдістеріне, аса маңызды ақпараттық инфрақұрылымды қорғауға, киберқауіпсіздік индустриясын дамытуға және кадрларды даярлау жүйесін жетілдіруге байланысты мәселелер талқыланды.

Цифрлық даму, инновациялар және аэроғарыш өнеркәсібі министрі Жаслан Мәдиев пен Ұлттық қауіпсіздік комитетінің төрағасы Ермек Сағымбаев баяндама жасады.

Мемлекет басшысы киберқылмыспен, оның ішінде кибер алаяқтықпен күрестің, сондай-ақ киберқылмыстарды тергеуге тартылған мемлекеттік органдардың құзыретін арттыру жөніндегі шаралардың ерекше маңыздылығын атап өтті.

Сонымен қатар, Қасым-Жомарт Тоқаев азаматтардың дербес деректерінің қорғалуын қамтамасыз етуді және олардың ағып кетуі үшін жауапкершілікті қатаңдатуды басым міндеттер деп атады. Ол атап өткендей, кибер ортада қауіпсіз және жауапты мінез-құлық қағидаттарын кеңінен түсіндіру мақсатында халық арасында профилактикалық жұмысты күшейту қажет.

Отырыс қорытындысы бойынша Президент стратегиялық тәуекелдерді азайтуға және Киберқауіпсіздіктің жүйелі мәселелерін шешуге бағытталған бірқатар шараларды қабылдауды тапсырды.