Қазақстанда жаңа ЖЭО "таза көмір" технологияларын қолдана отырып салынады

Е. Ақкенженов жаһандық декарбонизация тренді жағдайында және көміртегі ізін төмендетудің ұлттық бағытына сәйкес Қазақстан "таза көмір" технологиясына бәс тігіп отырғанын атап өтті.

Оның айтуынша, бүгінде елімізде энергетикалық көмірдің расталған қоры 33,6 млрд тоннаны құрайды. Бұл жағдайда көмір өндіруден толық бас тарту жақын арада экономикалық тұрғыдан мүмкін емес. Оның орнына озық технологияларды пайдалану арқылы экологиялық қауіпсіздікті қамтамасыз етуге мүмкіндік беретін тәсіл іске асырылатын болады.

"Осыған байланысты жаңа көмір станцияларын салу, сондай-ақ жұмыс істеп тұрған көмір станцияларын жаңғырту экологияға ең аз әсер ете отырып, экологиялық талаптар мен нормаларға сәйкес келетін таза көмір технологияларына негізделетін болады. Мұндай жобалардың жарқын мысалы Көкшетау, Семей және Өскемен қалаларында, сондай-ақ Курчатов және Екібастұз қалаларында ірі электр станцияларын іске асыру жоспарланып отырған ЖЭО болып табылады", — деді Е.Ақкенженов.

"Таза көмір" технологияларын қолдану экологиялық стандарттарға сәйкестікті қамтамасыз етеді, қоршаған ортаға әсерді азайтады және тұтынушыларға электр энергиясының қолжетімділігін сақтай отырып, көмір өндірудің тиімділігін арттырады, деп атап өтті ол.