Қазақстандағы АЭС атауын таңдау жөніндегі конкурстық комиссияның құрамы бекітілді

Отырысқа жұмыс тобының құрамына кірген мемлекеттік органдардың, ғылыми ұйымдардың және салалық компаниялардың өкілдері қатысты. Отырыс Атом энергиясы агенттігінің басшысы Алмасадам Сәтқалиевтің төрағалығымен өтті.

Талқылау барысында конкурстық комиссияның ережесі мен құрамы бекітілді, оған жұртшылық, креативті индустрия өкілдері, сондай-ақ атом энергетикасы, филология және тарих саласындағы сарапшылар кірді. Бұдан басқа, өтінімдерді беру және қарау тәртібін, оларды бағалау критерийлерін және қорытынды шешімдер қабылдауды айқындайтын конкурсты өткізу қағидаларының жобасы қаралды.

Жұмыс тобының мүшелері атом электр станциясының ең жақсы атауы бойынша шешім факторлардың жиынтығы бойынша қабылданатынын атап өтті. Конкурстық комиссия ұсыныстарды мынадай критерийлер бойынша бағалайтын болады: танымалдығы, тарихи және мәдени маңыздылығы, атом энергетикасы имиджіне сәйкестігі, үндестігі, есте сақтаудың жеңілдігі, бірегейлігі мен өзіндік ерекшелігі.

Бұдан басқа, қарауға қатыгез немесе кемсітушілік сөз тіркестерін, балағат сөздерді, коммерциялық брендтерді атап өтуді және Қазақстан Республикасының заңнамасын, авторлық құқықты қоса алғанда, үшінші тұлғалардың құқықтарын өзге де жолмен бұзатын ұсыныстар қабылданбайды.

Азаматтардың кеңінен қатысуын қамтамасыз ету үшін цифрлық шешімдерді пайдалану жоспарлануда. Цифрлық даму және аэроғарыш өнеркәсібі министрлігі "ҰАТ" АҚ-мен бірлесіп eGov Mobile қосымшасы арқылы өтінімдерді қабылдау бойынша ұсыныстар ұсынды.

Отырыс қорытындысы бойынша конкурстың негізгі ұйымдастыру құжаттары бекітіліп, оны өткізу бойынша одан әрі қадамдар айқындалды. Болашақ атом станциясының атауын таңдауға бағытталған Конкурс азаматтарды тартудың маңызды құралы болады және елдің мәдени және тарихи құндылықтарын көрсетуге мүмкіндік береді.