Тоқаев елдің цифрлық саясатының тоғыз басымдығын атап өтті

"Таяудағы бес жылда Қазақстан Цифрлық мемлекетке айналуы тиіс. Бұл айқын және өзгермейтін мақсат. Біз жасанды интеллект әлеуетін толық пайдаланатын ел болуымыз керек. Осы жоғары мақсатқа жету үшін стратегиялық бағытты нақты анықтау қажет. Жаһандық технологиялық бәсекелестік пен жасанды интеллекттің қарқынды дамуы жағдайында біздің күш-жігеріміздің тұтастығы мен сабақтастығын қамтамасыз ететін кешенді бағдарлама қажет. Үкімет Стратегиялық жоспарлау және реформалар жөніндегі агенттікпен бірлесіп, елдің жасанды интеллектін және цифрлық трансформациясын дамыту жөніндегі жүйелік құжатты әзірлеуге тиіс. Бұл жұмысқа халықаралық компаниялар мен беделді сарапшыларды тарту қажет. Құжат мүлдем прагматикалық, түсінікті болуы керек және біздің әрі қарайғы жұмысымызға нұсқаулық ретінде қызмет етуі керек. Құжат жасанды интеллектті дамыту мен қолданудың барлық аспектілері бойынша нақты шаралар кешенін қамтуы тиіс. Бұл технологияны экономика мен мемлекеттік секторға енгізу тұрғысынан нақты және түсінікті болуы керек. Оның міндеті-елдің бәсекеге қабілеттілігін арттыруға және жаңа индустриялар құруға жәрдемдесу. Сондай – ақ, ауқымды оқыту бағдарламалары мен кадрларға қажеттілікті болжау арқылы еңбек нарығын трансформациялауды басқаруға назар аудару маңызды", – деп атап өтті Президент.

Қасым-Жомарт Тоқаев мемлекеттің цифрлық саясатының негізі болуға тиіс тоғыз басым бағытты белгіледі.

Бірінші. Экономиканың нақты секторына жасанды интеллект енгізуді бастау керек. Міндет оңай емес, бірақ өмірлік маңызды, өйткені ол экономиканы толық жаңғыртуға, еңбек өнімділігінің өсуіне ықпал етеді. Ол үшін біздің ірі кәсіпорындарымызбен өзара іс-қимыл жасау керек. Үкімет "Самұрық – Қазынамен" бірлесіп, жыл соңына дейін экономикалық әсерін көрсете отырып, өндірістік процестерге АИ енгізудің нақты мысалдарын ұсынуы тиіс, - деді Мемлекет басшысы.