Қазақстанда магистратураға тестілеудің 99 нәтижесі жойылды

Бүгінгі таңда магистратураға түсу үшін 39 мыңнан астам үміткер тестілеуден өтті. Ғылыми-педагогикалық бағыт бойынша шекті балды түсушілердің 52%, бейіндік бағыт бойынша – 21% жинады. Ғылыми-педагогикалық бағыт бойынша орташа көрсеткіш 78 балды, бейіндік бағыт бойынша – 23 балды құрады. Ең жоғары балл – 139.

Тестілеу басталғаннан бері ережелерді бұзғаны үшін 99 қатысушының нәтижелері жойылды. Оның ішінде, емтиханға дейін смартфондарды, шпаргалкаларды және басқа да тыйым салынған заттарды алып өту әрекеттері үшін 67 үміткер жіберілмеді. Тестілеу кезінде ережелерді бұзғаны үшін аудиториядан 31 адам алынып тасталды, олардың нәтижелері де жойылды. Тестілеуге жіберу рәсімі кезінде 1 бөгде адамның кіру әрекеті анықталды.

Онлайн-апелляция мүмкіндігі қарастырылған, оған сәйкес тестілеу аяқталғаннан кейін 30 минут ішінде түсуші алынған нәтижелермен келіспеу туралы өтініш береді. Апелляция жеті жұмыс күні ішінде қаралады. Сертификат апелляциялық шағым туралы шешім қабылданғаннан кейін тестіленушінің жеке кабинетінде қолжетімді болады.

Магистратураға ғылыми-педагогикалық бағытқа түсу үшін шекті балл – 75 балл, бейіндік бағытқа – 30 балл.

Естеріңізге сала кетейік, кешенді тестілеуге барлығы 51 мыңнан астам өтініш берілген. Сонымен қатар, биыл магистратурада оқу үшін 13 мыңнан астам грант бөлінді. Биыл магистратураға түсу үшін кешенді тестілеу 21 шілдеде басталып, 7 тамызға дейін жалғасады.