Президент көлік қызметкерлерін құттықтап, саланы ауқымды жаңғырту туралы мәлімдеді

"Көлік саласы біздің еліміз үшін стратегиялық маңызға ие. Бұл экономикалық өсудің маңызды көрсеткіші болып табылады, сондықтан үнемі ерекше назарда болады. Көлік жүйесі экономиканың қозғаушы күші, прогресс пен өркендеудің кепілі деп айту артық айтқандық емес. Біздің еліміз осы салада орасан зор, бірегей әлеуетке ие. Қазақстан Еуразияның негізгі транзиттік тораптарының бірі болып табылады. Қазіргі уақытта Қытай, Орталық Азия және Еуропа арасында жүктерді жеткізуді қамтамасыз ететін Транскаспий халықаралық көлік бағытын дамыту бойынша үлкен жұмыс жүргізілуде. Өткен жылы "Бір белдеу, бір жол" жаһандық бастамасы аясында Қытаймен бірлесіп Сиань қаласында көлік-логистикалық орталық ашылды. Бұл қадам халықаралық жүк тасымалы көлемін ұлғайтуға ықпал ететіні сөзсіз", - деді Мемлекет басшысы.

Қасым-Жомарт Тоқаев Қазақстан өз аумағы арқылы өтетін көлік дәліздерінің инфрақұрылымын дәйекті жаңғыртуға кіріскенін хабарлады.

"Логистикалық орталықтар мен қоймалар ашылып, теміржол магистральдарының құрылысы жанданды. Мұндай ауқымды шаралар сыртқы сауданың көлемін арттырып қана қоймай, елдің экономикалық өсуіне ықпал ететініне сенімдімін. Ағымдағы жылы Достық – Мойынты учаскесінде екінші жолдардың құрылысы аяқталады, бұл жүк тасымалдау көлемін бес есеге арттыруға мүмкіндік береді. Мұндай ірі жобаны отандық ұйымдар жүзеге асырып жатқанын ерекше атап өткім келеді. Осы жылдың соңында Алматыда айналма жол пайдалануға беріледі, бұл көлік торабына жүктемені азайтуға және жүктерді жеткізу мерзімін қысқартуға мүмкіндік береді. Көлік саласы озық, заманауи және бәсекеге қабілетті болуы керек. Сондықтан жақын арада еліміздегі темір жолдар желісінің ұзақтығын едәуір ұлғайту жоспарлануда. 11 мың шақырым жолды жөндеу жалғасады, 5 мың шақырым жол салынып, жаңғыртылады. Трансқазақстандық теміржол дәлізінің ауқымды жобасы іске қосылды. Менің тапсырмам бойынша жалпы ұзындығы 323 шақырым Мойынты – Қызылжар теміржол желісі салынуда. Сонымен қатар, Дарбаза – Мақтаарал және Аягөз – бақты учаскелерінің құрылысы қарқынды жүріп жатыр", - деді Президент.