Қазақстандағы курорттық аймақтарды тексергеннен кейін ондаған шенеунік жазаланды

10-12 шілдеде Алматы және Қарағанды облыстарына, Жетісу және Абай облыстарына инспекциялық сапар барысында бірқатар жүйелі бұзушылықтар анықталды.

Жұмыс тобының мүшелері туристермен кездесулер өткізіп, Қапшағай су қоймасындағы, Алакөл және Балқаш көлдеріндегі инфрақұрылыммен танысты. Азаматтардың туристік инфрақұрылымның жай-күйіне, сервистің жеткіліксіз деңгейіне және қажетті қауіпсіздік шараларының болмауына қатысты өтініштері расталды.

Жергілікті атқарушы органдар басқаратын коммуналдық жағажайлардың жағдайы ерекше алаңдаушылық туғызды. Абаттандыру нормаларын бұзу фактілері, чектер бермей қызмет көрсететін бизнес субъектілерінде кассалық тәртіптің болмауы, сондай-ақ санитарлық талаптар мен қауіпсіздік нормаларын елемеу фактілері тіркелді.

Инспекция қорытындысы бойынша және Президенттің тапсырмасын орындау үшін жауапты лауазымды тұлғаларға қатысты тәртіптік жаза қолданылды:

-туризмді дамытуға жауапты туризм және спорт вице-министріне, сондай-ақ Алматы, Қарағанды, Абай облыстары және Жетісу облысы әкімдерінің орынбасарларына қатаң сөгіс жарияланды;

- Қонаев және Балқаш қалаларының, Алакөл ауданы мен Мақаншы ауданының әкімдеріне, сондай-ақ ауылдық округтердің әкімдеріне сөгіс жарияланды;

- кәсіпкерлікке, туризмге, қоршаған ортаны қорғауға, сәулет пен саудаға жауапты облыстық басқармалардың басшыларына жазалау шаралары қолданылды;

- экология және табиғи ресурстар, Денсаулық сақтау, қаржы, су ресурстары және ирригация, сауда және интеграция, көлік министрліктерінің аумақтық бөлімшелерінің басшылары жауапкершілікке тартылды.

Жергілікті жерлерде орталық мемлекеттік органдар өкілдерінің қатысуымен көшпелі тексерулер жүргізіледі. Тексеру қорытындысы бойынша туристік инфрақұрылымды дамытудың Жол картасы әзірленетін болады, онда саладағы жүйелік проблемаларды жою жөніндегі бірінші кезектегі шаралар айқындалатын болады.

Бұдан басқа, жұмыс істеп тұрған жұмыс тобының базасында туристік қызметтердің сапасын арттыру, курорттық аймақтарды абаттандыру және жергілікті жерлерде құқықтық тәртіпті қамтамасыз ету жөніндегі жұмысты тұрақты негізде үйлестіретін Жобалық кеңсе қалыптастырылды.