Жыл басынан бері Балқаш көлінің деңгейі 32 см өсті

Жыл басынан бастап бүгінгі күнге дейін Алматы облысының Қапшағай су қоймасынан Балқаш көліне 8,52 млрд текше метр су жіберілді. Өткен жылдың осы кезеңінде бұл көрсеткіш 8 млрд текше метрді құрады.

Жалпы биыл Қапшағай су қоймасынан көлге 12 млрд текше метр су жіберу жоспарлануда. Балқаштағы су көлемі көбінесе ағыны Қапшағай су қоймасымен реттелетін трансшекаралық Іле өзеніне байланысты.

Су қоймасының өзі биыл екінші жыл қатарынан 100% - ға толды. Естеріңізге сала кетейік, бір жыл бұрын нысан 10 жылда алғаш рет 100% - ға толды. Қапшағай су қоймасын толтыру Алматы облысының Ақдала және Шеңгелді суару алқаптарын вегетациялық кезеңде сумен толық қамтамасыз етуге мүмкіндік берді.

"Балқашты сақтау мәселесіне ерекше көңіл бөлінді. Осы жылдың басында француз ғылыми консорциумымен бірлесіп ұйымдастырылған көл бассейнін зерттеу мақсатында ауқымды далалық экспедиция өтті. Француз сарапшыларымен бірлесіп жүргізіліп жатқан жұмыс 2040 жылға дейінгі болжаммен Балқаш көлін сақтау бойынша мастер-жоспар әзірлеуге бағытталған. Мұның бәрі-өткен жылы Францияның даму агенттігімен және Францияның геологиялық және тау-кен зерттеулер бюросымен қол қойылған үшжақты келісімнің бір бөлігі", - деді су ресурстары және ирригация министрі Нұржан Нұржігітов.