Қазақстандағы мүгедектік: еңбекке қабілеттілігін кім және неге жоғалтады

"Көптеген адамдар тірек-қимыл аппаратының жарақатынан кейін мүгедек болып қалады. Егер адамның аяқ-қолдары, қабырғалары немесе жамбастары сынған болса, қалпына келтіру үшін жылдар қажет. Мұндай кезеңдерде адамның уақытша мүгедектікке құқығы бар, ал мемлекет зардап шеккендерге барлық жағынан көмек көрсетеді", — деп түсіндірді Академик Н.Д.Батпенов атындағы Ұлттық Травматология және ортопедия ғылыми орталығының директоры Олжас Бекарысов.

Еңбек министрлігінің мәліметінше, бүгінде елімізде 700 мыңға жуық мүгедек адам бар. Себептердің қатарына тек жарақаттар ғана емес, сонымен қатар инсульт, инфаркт, тыныс алу жүйесінің созылмалы аурулары, қант диабеті, тұқым қуалайтын және онкологиялық аурулар жатады.

Спикерлер бүгінде скринингтер мен ерте диагностикадан бастап амбулаториялық дәрі – дәрмекпен қамтамасыз етуге дейін ауқымды профилактикалық жұмыстар жүргізіліп жатқанын атап өтті. Балалар үшін бес бағыт бойынша ерте анықтау жүйесі жұмыс істейді.

Мүгедектік мәртебесін жыл сайын растауға келетін болсақ, процедура диагнозға байланысты. Дәрігерлік-консультативтік комиссиялар дене функцияларының бұзылу дәрежесін анықтайды, ал медициналық-әлеуметтік сараптама топтың қажеттілігін және оның қолданылу мерзімін анықтайды.

"Бірнеше жыл бұрын біз сырттай куәландыруды енгіздік. Ампутация және генетикалық аурулар кезінде мүгедектік мерзімсіз беріледі. Бірақ егер ағзаның функциялары қалпына келтірілсе, мысалы, стенттеуден немесе шунттаудан кейін топ алынып тасталуы мүмкін", - деп атап өтті ҚР Денсаулық сақтау министрлігінің Медициналық көмекті ұйымдастыру департаментінің директоры Гүлнара Сәрсенбаева.

Спикерлердің айтуынша, рәсімдерді жеңілдету мәселесі жұмыс күйінде қалып отыр және ведомстволар шынымен мұқтаж жандар үшін мүгедектікті алу және ұзарту процесін жеңілдетуге тырысады.