Қазақстанда жауапты инвесторларға қосымша салықтық жеңілдіктер беріледі

Қазіргі уақытта қолданыстағы заңнама Қазақстан Республикасының Кәсіпкерлік кодексіне сәйкес инвестициялық жобаларды табысты іске асыру үшін мемлекеттік қолдаудың кең спектрін көздейді. Кодекске сәйкес, мемлекеттік қолдау шаралары инвестициялық келісім, арнайы инвестициялық келісімшарт және инвестициялық жобаны іске асыру кезінде инвестициялар туралы Келісім шеңберінде ұсынылады, — деп хабарлады ведомстводан.

Министрлікте нақтыланғандай, жобаның ерекшеліктеріне және инвестициялар көлеміне байланысты импорт кезінде кедендік баждар мен қосылған құн салығын, корпоративтік табыс салығын, жер мен мүлік салығын төлеуден босату, сондай-ақ мемлекеттен заттай гранттар беру және заңнама өзгерген жағдайда шарттардың тұрақтылығын қамтамасыз ету көзделген.

"Жер қойнауын пайдалану саласындағы инвестициялық ахуалды жақсарту үшін жаңа тетік — жетілдірілген модельдік келісімшарт енгізілді. Ол теңіз және жер үсті жобалары үшін, соның ішінде газ жобалары үшін бірқатар артықшылықтарды ұсынады. Бұл механизм күрделі мұнай-газ жобалары үшін реттеуші және фискалдық преференцияларды қарастырады. Бұдан басқа, Үкімет салықтық шегерімдер есебінен инфрақұрылымды салуға инвестордың шығындарын өтеу түрінде қолдаудың жаңа құралын әзірлеуде", - деп толықтырды министрлікте.

Сондай-ақ, ведомство кәсіпкерлік және Салық кодекстеріне тиісті заңнамалық түзетулер дайындалғанын атап өтті. Түзетулерге сәйкес, жеңілдікті салық кезеңі аяқталғаннан кейін инвестициялық келісім және/немесе инвестициялық келісімшарт жасасқан инвестордың салық міндеттемелері инвестициялық жобаны іске асыру үшін инфрақұрылымдық объектілерді салу кезінде жұмсалған нақты шығыстар сомасына азайтылуы мүмкін.