Қандай жағдайда Қазақстандағы дәрігерлер 8,5 млн теңге көлемінде біржолғы жәрдемақы ала алады

Ведомствода заңның негізгі ережелері мен іске асырылып жатқан шаралар туралы айтылды:

- 2024 жылдың қазан айынан бастап 186 мыңнан астам медицина қызметкерін қамтыған кәсіби жауапкершілікті сақтандыру жүйесі енгізілді.

- Ауылға 5 жыл және одан да көп мерзімге жұмысқа шығатын тапшы мамандықтардың дәрігерлеріне 100 ЕТЖ (8,5 млн теңге) мөлшерінде біржолғы жәрдемақы төленеді. Қазірдің өзінде 254 дәрігер жалпы сомасы 2,1 млрд теңгеден астам төлем алды.

Сондай-ақ, денсаулық сақтау министрлігі медицина қызметкерлерін, әсіресе ауылдық елді мекендерде тарту және бекіту үшін мемлекеттік қолдау шараларының кешені іске асырылып жатқанын атап өтті:

- әлеуметтік кепілдіктер беру;
- тұрғын үй жағдайын жақсарту;
- материалдық ынталандыру.

"Осы шаралардың нәтижесінде 2024 жылдың қорытындысы бойынша дәрігерлердің тапшылығы 3986 бірлікті құрады, бұл 2023 жылмен салыстырғанда 20% - ға аз. Орта медициналық персонал бойынша тапшылық өткен жылмен салыстырғанда 7% - ға төмендеп, 4230,75 бірлікті құрады", - деді ҚР ДСМ баспасөз қызметі.

2025 жылғы 1 қаңтардағы жағдай бойынша барлық ведомстволық мекемелерді қоса алғанда, Қазақстанның денсаулық сақтау жүйесінде 275 мыңға жуық медицина қызметкері жұмыс істейді, оның ішінде:

- 83 мыңнан астам дәрігер;
- 191 мыңға жуық орта медициналық маман.

"Соңғы үш жылда біз медицина кадрлары санының өсуі бойынша тұрақты оң динамиканы байқап отырмыз: дәрігерлер саны 2% – ға, ал орта медицина қызметкерлері 0,5% - ға өсті. Бүгінгі таңда Қазақстанда медициналық кадрлармен қамтамасыз ету ЭЫДҰ елдерінің орташа көрсеткіштерінен асып түседі, бұл іске асырылып жатқан кадр саясатының тиімділігін растайды", – деді бүгін ОКҚ брифингінде денсаулық сақтау вице-министрі Тимур Сұлтанғазиев.