Экологиялық сараптама жүргізу ережелері өзгерді

Атап айтқанда, эмиссиялар нормативтерінің жобалары, 2021 жылғы 1 шілдеге дейін берілген кешенді экологиялық рұқсат негізінде пайдаланылатын I санаттағы объектінің қалдықтарды басқару бағдарламасының жобалары міндетті мемлекеттік экологиялық сараптамаға жататыны толықтырылды.

Сонымен қатар, іргелес мемлекеттердің қоршаған ортасына әсер етуі мүмкін немесе оны жүзеге асыру үшін іргелес мемлекеттермен ортақ табиғи объектілерді пайдалану қажет болатын не шектес мемлекеттердің, оның ішінде ҚР халықаралық шарттарында айқындалған "Байқоңыр" кешені бойынша мүдделерін қозғайтын шаруашылық қызметтің жобалары экологиялық сараптамаға жататыны нақтыланады.

Зымыран тасығыштардың бөлінетін бөліктері құлаған аудандарда қоршаған ортаға әсерді бағалауды жүргізу тәртібі мен тетігі зымыран тасығыштардың бөлінетін бөліктері құлаған аудандарда қоршаған ортаға әсерді бағалау әдістемесі бойынша айқындалады.

Сондай-ақ, мемлекеттік экологиялық сараптаманы жүзеге асырудың оң нәтижесі мемлекеттік экологиялық сараптаманың қорытындысын беру болып табылады. Қорытындыда "келіседі"деген қорытынды көрсетіледі.

Бұл ретте мемлекеттік экологиялық сараптамаға ұсынылған құжаттама ҚР экологиялық заңнамасының талаптарына сәйкес келмеген, дәлелді ескертулер жойылмаған жағдайда, сондай-ақ Қағидаларға 5 және 6-қосымшалардың 9-тармағында көрсетілген негіздер бойынша мемлекеттік экологиялық сараптаманың теріс қорытындысы шығарылатыны қосылды.

Мемлекеттік экологиялық сараптаманы жүзеге асыру нәтижесі "мемлекеттік қызмет көрсетуден бас тартады"деген қорытындымен Мемлекеттік қызмет көрсетуден дәлелді бас тарту болып табылады.

Мемлекеттік қызметті көрсету нәтижесі көрсетілетін қызметті беруші басшысының ЭЦҚ қойылған электрондық құжат нысанында өтініш берушінің "Жеке кабинетіне" жіберіледі.

Көрсетілетін қызметті беруші өтініш тіркелген сәттен бастап 25 жұмыс күні ішінде портал арқылы көрсетілетін қызметті алушыға жібереді:

- мемлекеттік экологиялық сараптаманың қорытындысы ескертулер болмаған жағдайда "келісіледі" ;
- ұсынылған құжаттардың мазмұны бойынша дәлелді ескертулер болған жағдайда пысықтау үшін.

Көрсетілетін қызметті алушы дәлелді ескертулерді алған күннен бастап 10 жұмыс күні ішінде көрсетілетін қызметті берушіге пысықталған құжаттарды ұсынады.

Көрсетілетін қызметті алушы дәлелді ескертулерді жойған жағдайда көрсетілетін қызметті берушінің орындаушысы 10 жұмыс күні ішінде "келісіледі"деген қорытындымен мемлекеттік экологиялық сараптаманың қорытындысын дайындайды.

Бұйрық 2025 жылғы 16 маусымнан бастап қолданысқа енгізіледі.