ТЖМ тексерілген әрбір екінші нысанда бұзушылықтарды анықтады

Ол министрлік ел бойынша өрт және өнеркәсіптік қауіпсіздікті қамтамасыз ету үшін тиісті тексерулер жүргізіп жатқанын атап өтті.

"Жыл басынан бері 16 мыңға жуық нысан тексеріліп, 100 мыңнан астам бұзушылық анықталды. Қызметкерлердің өмірі мен денсаулығына зиян келтіру қаупін туғызатын өрескел бұзушылықтар үшін 7,5 мыңнан астам нысанның қызметі тоқтатылды. Бұл ретте объектілердің 95% – ы өрт автоматикасының жоқтығы мен ақаулығы, қызметкерлерді оқытусыз және нұсқаусыз жіберу, сондай-ақ эвакуациялық шығу жолдарын бітеу сияқты өрт қауіпсіздігін бұзғаны үшін тоқтатылды", - деді Шыңғыс Аринов.

ТЖМ басшысы өнеркәсіптік қауіпсіздікті бұзғаны үшін тоқтатылған қызмет саны 4,5 есе өскенін атап өтті.

"Қауіпті өндірістік объектілерде анықталған бұзушылықтар қызметкерлердің жарақаттануымен және қаза болуымен қатар жүретін авариялар мен инциденттерге әкеп соғуы сирек емес. Ағымдағы жылдың қаңтар-мамыр айлары аралығында мұнай-химия және тау-кен салаларында, сондай-ақ қазандық және газ шаруашылығы объектілерінде, өсімдік шикізатын қайта өңдеуде 60-тан астам оқиға тіркелген. 22 қызметкер жарақат алды, өкінішке орай, 15 адам қаза тапты", - деді Шыңғыс Аринов.