Тоқаев цифрландыруды және әлеуметтік қолдаудың атаулылығын күшейтуді тапсырды

Ақорданың сайтында 2025 жылғы 3 маусымда жарияланған деректерге сәйкес, Жақыпова ағымдағы жылдың 1 мамырындағы жағдай бойынша жұмыспен қамтуға жәрдемдесудің белсенді шараларымен 157,8 мың адам қамтылғанын, оның ішінде 143,2 мың азамат жұмысқа орналастырылғанын мәлімдеді. Жыл басынан бері атаулы әлеуметтік көмек 232 мыңнан астам адамға тағайындалды.

Сонымен қатар, президент еңбек қауіпсіздігін қамтамасыз ету және еңбек құқықтарын қорғау бойынша қабылданып жатқан шаралар туралы хабардар етілді.

Жүйелі жұмыс нәтижесінде өндірістік жарақаттану деңгейі ағымдағы жылдың І тоқсанында 17% – ға, ал өліммен аяқталған жазатайым оқиғалар саны өткен жылдың сәйкес кезеңімен салыстырғанда 5% - ға төмендеді. Сондай-ақ, кәсіптік тәуекелдерді анықтаудың, бағалаудың және алдын алудың автоматтандырылған жүйесі, сондай-ақ еңбек қатынастарын декларациялау тетігі енгізілуде.

Қасым-Жомарт Тоқаевқа мемлекеттік инвестициялардың тиімділігін арттыру және жұмыс орындарын сапалы жоспарлау үшін әзірленген жобалардың инновациялық навигаторын енгізу барысы туралы ақпарат берілді.

Светлана Жақыпова бұдан әрі әлеуметтік қолдау көрсету үдерістерін цифрландыру туралы айтып берді. Атап айтқанда, министр үй шаруашылықтарының әлеуметтік-экономикалық тұрақтылығы мен осалдығын бағалау үшін скорингтік модельді қолдану тұжырымдамасын ұсынды. Оны енгізу ресурстарды шынымен мұқтаж азаматтардың пайдасына қайта бөлуге және ұсынылатын қолдау шараларының атаулылығын арттыруға мүмкіндік береді.

Кездесу қорытындысы бойынша Мемлекет басшысы әлеуметтік саясатты одан әрі жетілдіруге, атаулы көмектің тиімділігін арттыруға, жұмыспен қамтуды ресімдеу жөніндегі шараларды кеңейтуге және әлеуметтік-еңбек саласындағы цифрландыруды күшейтуге бағытталған бірқатар тапсырмалар берді.