Президенттік өкілеттіктерді шектеу Қазақстанды орнықты етеді — Тоқаев

"Соңғы бірнеше жылда Қазақстан терең экономикалық және институционалдық реформалар жүргізді. Біз неғұрлым әртараптандырылған, инклюзивті және болашаққа бағдарланған экономиканы құруға бел будық", - деді Мемлекет басшысы.

Тоқаев елімізде саяси жүйе реформаланғанын еске салды: референдум арқылы конституцияға өзгерістер енгізілді, президенттік өкілеттіктер шектелді және басқарудың жаңа қағидаттары қаланды.

"Біз "суперпрезиденттік" басқару формасынан тежеу және тепе-теңдік жүйесімен президенттік республикаға көштік. Президенттік басқару бір жеті жылдық мерзіммен шектеледі. Бұл біздің саяси жүйемізді орнықты, экономикамызды серпінді және қоғамды өркениетті етеді", - деп атап өтті ол.

Демократияның дамуы туралы айта келе, Тоқаев Парламенттегі азаматтық қоғамның, оның ішінде жаңа партиялардың, әйелдердің, жастардың және осал топтардың өкілдігінің кеңеюін атап өтті. Ол сондай-ақ адам құқықтарын қорғауға басымдық берді.

"Заң және тәртіп" тұжырымдамасына негізделген адам құқықтарын қорғаудың пәрменді жүйесінсіз одан әрі дамыту мүмкін емес деп санаймын", - деді президент.

Жаһандық тұрақсыздыққа қарамастан, Қазақстан оң серпінін сақтап отыр.

"2024 жылы біздің экономикамыздың өсуі 5,1% -. құрады, тікелей шетелдік инвестициялар көлемі рекордтық көрсеткіштерге жетті, Транскаспий бағыты бойынша жүк ағыны 62% - ға өсті".

Президенттің айтуынша, реформалар тек сандар ғана емес, жаңа әлеуметтік келісімшарттың негізі болып табылады.

"Президент – өз халқының белгілі бір мерзімге, біздің жағдайда жеті жылға жалдаған мемлекеттік басқарушы екеніне сенімдімін", – деп түйіндеді Тоқаев.