Қазақстандықтарға туу және бала күтімі бойынша жәрдемақы үшін 300 млрд теңге төленді

Республикалық бюджеттен бала тууға 21,1 млрд теңге сомаға 117 мың адам жәрдемақы алды. Сәуір айында бұл қолдау түрін 5,5 млрд теңгеге 30,5 мың адам алды. Жәрдемақы алуға Қазақстан азаматтары, қандастар, сондай-ақ туған, асырап алынған немесе қамқорлыққа алынған балалары бар шетелдіктер құқылы.

1,5 жасқа дейінгі бала күтімі бойынша жәрдемақыны орта есеппен 14,4 млрд теңгеге 123,3 мың адам алды, оның ішінде сәуір айында — 3,7 млрд теңгеге 124,1 мың адам. Бұл жәрдемақы бала күтіміндегі адамдарға, егер олар міндетті әлеуметтік сақтандыру жүйесінде болмаса, беріледі.

Жәрдемақы мөлшері 6,5% индекстелген және айлық есептік көрсеткішке (АЕК) байланысты. 2025 жылы бала тууға арналған жәрдемақы:

- Бірінші, екінші және үшінші балаға 38 АЕК (149 416 теңге);

- Төртінші және одан кейінгі балаларға 63 АЕК (247 716 теңге).

Күтім бойынша жәрдемақы ай сайын бірінші балаға 5,76 АЕК (22 648 теңге) - ден төртінші және одан кейінгі балаларға 8,9 АЕК (34 995 теңге) мөлшерінде төленеді.

Бұдан басқа, жұмыс істейтін азаматтарға жүктілігі және босануы бойынша демалыс кезеңінде, сондай-ақ жаңа туған нәрестені асырап алған кезде МӘСҚ-дан әлеуметтік төлем тағайындалады. 2025 жылдың алғашқы төрт айында бұл біржолғы төлемді 117,3 млрд теңге сомасына 81,8 мың адам алды, төлемнің орташа мөлшері — шамамен 1,64 млн теңге.

1,5 жасқа дейінгі бала күтімі кезінде табысынан айырылу жағдайы бойынша ай сайынғы әлеуметтік төлем соңғы екі жылдағы орташа айлық табыстың 40% мөлшерінде төленеді. Төрт ай ішінде 147 млрд теңгеге 88,8 мың адам, сәуір айында — 36,7 млрд теңгеге 25,2 мың адамға төлем тағайындалды. Ай сайынғы төлемнің орташа мөлшері-91 953 теңге.