Қорғаныс министрі Қазақстан армиясының даму басымдықтарын атап өтті

Іс-шараға Қорғаныс министрлігінің, Бас штабтың басшылығы, Қарулы Күштер түрлерінің бас қолбасшылары, өңірлік қолбасшылықтар рулары мен әскерлерінің қолбасшылары, сондай-ақ әскери оқу орындарының бастықтары қатысты.

"Қорғаныс ведомствосының басшысы геосаяси жағдайдағы өзгерістерге назар аударды. Қазіргі заманғы жауынгерлік іс — қимылдарды жүргізудің шетелдік тәжірибесін талдауды ескере отырып, ол қазақстандық армияны дайындаудағы басымдықтарды белгіледі",-деп хабарлады Қорғаныс министрлігінің баспасөз қызметі.

Отырыс аясында Қорғаныс министрінің бірінші орынбасары – Бас штаб бастығы генерал-лейтенант Сұлтан Камалетдинов және Министрдің тәрбие және идеологиялық жұмыс жөніндегі орынбасары генерал-майор Шайх-Хасан Жазықбаев баяндама жасады. Жауынгерлік және жұмылдыру дайындығы мәселелеріне, сондай-ақ армия қатарындағы әскери тәртіптің жай-күйіне басты назар аударылды.

Министрдің орынбасарлары жұмылдыру резервін қалыптастыруға, әскери міндеттілер жиындарын жоспарлауға, резервтік қызмет жүйесін дамытуға, әскери бөлімдерде жарғылық тәртіпті сақтауға және құқық бұзушылықтардың алдын алуға ерекше назар аударды.

Бұдан басқа, жауынгерлік даярлықты арттыру, кадрлармен қамтамасыз ету, логистика және әскери құрамаларды техникалық сүйемелдеу жөніндегі шаралар талқыланды.

Отырыс соңында Қорғаныс министрі командалық құрамға алдағы оқу кезеңіне бірқатар міндеттер қойды. Олардың қатарында тактикалық барлауды пысықтай отырып, ҰҰА операторларын даярлау, жауынгерлік және арнайы даярлық бойынша практикалық сабақтарды ұйымдастыру, инженерлік-саперлік бөлімшелерді оқыту, қауіпсіздік шараларын күшейту және қарумен жұмыс істеу жөніндегі талаптарды сақтау бар.