Тек арнайы визамен кіру: қажылықты бұзушылар жазаланады

Сауд Арабиясы Корольдігінің Қажылық және умра министрлігі 2025 жылдың 29 сәуірі мен 10 маусымы аралығында қажылық ережелерін бұзған адамдарға, сондай — ақ заңсыз қажылыққа барғандарға қатысты жазалау шараларын жариялады, деп хабарлайды ҚМДБ баспасөз қызметі.

Ақпаратқа сәйкес, жазалау шаралары келесі жағдайларда қолданылады:

1. Лицензиясыз қажылық жасайтын немесе жасауға тырысатын, сондай-ақ осы кезеңде қасиетті жерлерде жүрген азаматтарға 20 мың Сауд Арабиясының риял (шамамен 5 300 АҚШ доллары) айыппұл салынады.
2. Арнайы "қажылық визасынсыз" қажылық жасауға тырысатын шетелдік азаматтарға, сондай-ақ визаның басқа түрлеріне қажылық ұйымдастыратын өкілдерге осындай әрбір виза үшін 100 мың Сауд риял (шамамен 26 600 АҚШ доллары) айыппұл салынады. Сонымен қатар, мұндай қажыларды (қонақүйлерде немесе жеке үйлерде) паналайтындар, тасымалдайтындар немесе орналастыратындар да осындай айыппұл алады.
3. Қажылықты заңсыз жасаған адамдар, соның ішінде Сауд Арабиясында уақытша тұратындар, визалары мерзімі өтіп кеткен немесе елде заңсыз жүрген адамдар депортацияланып, Сауд Арабиясына 10 жылға кіру құқығынан айырылады.
4. Егер шетелдік азаматтарды қажылық визасыз тасымалдайтын көлік құралдары қажыларға көмектесетіндерге тиесілі болса, онда бұл машиналар сот шешімімен мемлекет пайдасына тәркіленеді.
5. Виза мерзімі аяқталғаннан кейін елден кетпеген шетелдік азаматтарға 50 мың риял (шамамен 13 300 АҚШ доллары) айыппұл салынады, 6 айға дейін бас бостандығынан айыру және депортация.

Қажылық және умра министрлігі қажылар міндетті түрде НУСУК және ТАСРИХ платформалары арқылы рұқсат алуы керек екенін еске салады.

Айта кету керек: 2025 жылы қажылыққа тек арнайы "қажылық визасы"арқылы рұқсат етіледі. Меккеге және қасиетті орындарға визаның басқа түрлері бойынша кіруге қатаң тыйым салынады.

Биыл Қазақстаннан ресми түрде 4500 адам қажылыққа барады. Олардың Сауд Арабиясына кетуі 24-31 мамырға, ал оралуы 10-16 маусымға жоспарланған.

"Барлық қажыларды Сауд Арабиясының Қажылық және умра министрлігі шетелдік азаматтар үшін белгілеген ережелерді қатаң сақтауға шақырамыз. Сондай — ақ қажылық жасауға ниетті отандастарымызға кез келген заңсыз әрекеттерден бас тартуды және лицензиясы жоқ туристік фирмаларға бармауды ескертеміз", - деп хабарлайды ҚМДБ.

2025 жылы Сауд Арабиясы 1,8 миллион қажыны қабылдауды жоспарлап отыр. 2024 жылы билік қажылықты заңсыз жасаған 300 мыңнан астам шетелдік азаматты анықтады.