Еңбек жағдайлары мен оның жалақысының өзгеруі: қазақстандықтар нені білуі маңызды

ҚР ЕХӘҚМ мемлекеттік еңбек инспекциясы комитетінің бас сарапшысы Данияр Балтабай атап өткендей, еңбек жағдайларына мыналар жатады:

- нормалау және еңбекақы төлеу жүйесі,
- Еңбек міндеттерін орындау,
- жұмыс уақыты мен демалыс уақыты режимі,
- кәсіптер мен лауазымдарды қоса атқару тәртібі,
- уақытша болмаған қызметкердің міндеттерін орындау,
- еңбек қауіпсіздігі мен еңбекті қорғауды қамтамасыз ету,
- тараптардың келісімі бойынша айқындалған өзге де еңбек жағдайлары.

"Қайта ұйымдастыруға, экономикалық немесе технологиялық процестердің өзгеруіне, еңбекті ұйымдастыру жағдайларына немесе жұмыс көлемінің қысқаруына байланысты кәсіпорындарда өзгерістер болған жағдайда еңбек жағдайларының өзгеруі мүмкін. Мұндай өзгерістер Еңбек шартына міндетті түрде енгізілуге тиіс. Бұл ретте қызметкер өз мамандығы немесе біліктілігіне сәйкес келетін мамандығы бойынша жұмысын жалғастыруда", - деп түсіндірді ол.

Спикердің айтуынша, еңбек шартына кез келген өзгерістер немесе толықтырулар, оның ішінде басқа жұмысқа ауыстыру жұмыс беруші мен қызметкер арасындағы қосымша келісім түрінде жазбаша нысанда ресімделеді.

"Егер еңбек немесе ұжымдық шартта өзге мерзімдер көзделмесе, жұмыс беруші қызметкерге еңбек жағдайларының өзгергені туралы өзгерістер күшіне енгенге дейін кемінде күнтізбелік 15 күн бұрын хабарлауға міндетті", – деп атап өтті Данияр Балтабай.