Тістерді емдеу үшін Қазақстанға қай елдер келеді

Алматыда алғаш рет Дүниежүзілік стоматологтар федерациясының еуропалық секциясының пленарлық отырысы өтті, оған 48 елден 110 делегат жиналды. Салалық форум Еуропа мен Орталық Азия елдерінде стоматологияны дамытудың өзекті мәселелерін талқылау үшін маңызды алаңға айналды.

Отырысқа қатысушылар ауыз қуысы ауруларын диагностикалау мен емдеуде инновациялық технологияларды қолдануды, клиникалық практиканың әртүрлі аспектілерін, хирургиялық араласуларды, соның ішінде күрделі жағдайларды емдеуді, алдын алудың заманауи тәсілдерін талқылады.

Ашылу салтанатында ҚР Денсаулық сақтау министрі Ақмарал Әлназарова құттықтау сөз сөйледі. Ол стоматологияның қоғамдық денсаулықты қалыптастыруда шешуші рөл атқаратынын атап өтті.

"Стоматологиялық мәртебе ағзаның жалпы жай — күйінің негізгі көрсеткіштерінің бірі болып табылады және стоматологиялық сырқаттанушылық көрсеткіштерін төмендетуге бағытталған іс-шаралар жүйесін әзірлеу ұлтты сауықтыру жөніндегі бағдарламалардың ажырамас бөлігі болып табылады", - деп атап өтті ведомство басшысы.

Министр сонымен қатар барлық тіс дәрігерлерін, ең алдымен, алдын алу шаралары арқылы ауруды азайтуға бағытталған бірлескен күш-жігерге шақырды.

Қазақстанда өткен жылдан бастап мектеп жасындағы балаларда стоматологиялық аурулардың жүйелі алдын алу бағдарламасы енгізілді. Мақсаты-стоматологиялық аурулардың таралу деңгейін динамикалық бақылау, ауруларды ерте сатысында анықтау арқылы 10% - ға төмендету, сонымен бірге стоматологиялық көмектің қолжетімділігін балалар үшін 80% - ға дейін арттыру.

Бүгінде Қазақстанға тістерді, пародонт тіндерін емдеу, стоматологиялық имплантация жүргізу және протездеу үшін АҚШ, Германия, Иран, Ресей және ТМД елдерін қоса алғанда 37 елдің азаматтары келеді, бұл елдегі стоматологиялық көмек сапасының жоғары деңгейін растайды.