Денсаулық сақтау министрлігі әкімдіктерден ауылдарда медициналық кадрларды ұстау бойынша жұмысты бастауды сұрайды

Оның айтуынша, жыл соңына дейін ауылда 188 алғашқы медициналық-санитарлық көмек нысаны салынады.

"Нысандарды пайдалануға беру сәтіне 143 медицина қызметкерін жіберу жоспарлануда. Осыған байланысты, өңірлердің әкімдіктері қазірдің өзінде ауылға жаңадан келген кадрларды тарту және ұстап қалу бойынша жұмысты бастауы қажет. Барлық 655 нысанның аяқталуын ескере отырып, 1 млн-ға жуық ауыл тұрғыны қосымша қамтылады, алғашқы медициналық - санитарлық көмектің қолжетімділігі мен уақтылығы артады деп күтілуде", - деді министр.

Ол медицина қызметкерлерінің мәртебесін көтеру үшін әлеуметтік кепілдіктер мен ынталандырушы төлемдер пакеті кеңейтілгенін айтты. Мәселен, 2024 жылдан бастап ауылдық жерге жұмысқа келетін аса тапшы мамандықтардың медицина қызметкерлеріне 100 ЕТЖ – 8,5 млн теңге мөлшерінде біржолғы ақшалай төлемді көздейтін норма іске асырылуда.

"Алайда, бүгінгі таңда төлемдер бойынша шешімдер барлық өңірлерде қабылданбаған", - деді Әлназарова.

Сонымен қатар, оның мәліметінше, 2025 жылдың соңына дейін тағы 12 көпсалалы орталық аудандық аурухананы пайдалануға беру жоспарланып отыр.

"Онда 98 медицина қызметкерін мақсатты даярлау жүргізілуде. Қалған 14 нысандағы құрылыс жұмыстарын 2026 жылдың соңына дейін аяқтау жоспарлануда. Медициналық кадрлар туралы айта отырып, аудандық ауруханаларға 427 дәрігер жіберілгенін атап өткім келеді: 125 жас маман және 302 – жұмыс тәжірибесі бар, сондай-ақ 370 орта медицина қызметкері, оның ішінде 132 түлек және 238 жұмыс тәжірибесі бар мамандар. Қалған ауруханалар аяқталған кезде 85 дәрігер дайындалуда", - деді министр.

Оның айтуынша, "Алтын сағат" қағидаты бойынша шұғыл медициналық көмек көрсету үшін барлық аудандық ауруханалар жоғары технологиялық медициналық техникамен қамтамасыз етіледі.