Қазақстанда Жерді Қытайға беру туралы жалған қауесет жоққа шығарылды

Ақпаратқа Қазақстан Сыртқы істер министрлігінің баспасөз қызметі түсініктеме берді.

"Қазақстанның Қытайға ауыл шаруашылығы үшін жер беріп жатқаны туралы хабар шындыққа жанаспайды. Бұл жалған. Әлеуметтік желілерді пайдаланушыларға БАҚ немесе ақпараттық-коммуникациялық желілерді пайдалана отырып, көрінеу жалған ақпарат таратқаны үшін жауапкершілік көзделгенін еске саламыз. Тек ресми дереккөздерге сеніңіз", - делінген ҚР СІМ ресми хабарламасында.

Қазақстан ауыл шаруашылығы министрлігінің баспасөз қызметінде ауыл шаруашылығы өндірісі мен орман өсіруге арналған жерлерді қоспағанда, ҚР Жер Кодексінің 23-бабына сәйкес шетелдік азаматтар, азаматтығы жоқ адамдар, сондай-ақ шетелдік (мемлекеттік емес) заңды тұлғалар жер учаскелерін меншік құқығында иеленуі мүмкін екендігі түсіндірілді.

"Бұл учаскелер өндірістік және өндірістік емес объектілерді, соның ішінде тұрғын үйлер мен олардың кешендерін, сондай-ақ оларға қызмет көрсетуге арналған жерлерді қоса алғанда, осындай объектілер орналасқан учаскелерді салуға берілген жағдайларда мүмкін болады. Бұл ретте Қазақстан Республикасы Мемлекеттік шекарасының шекаралық белдеуінде орналасқан жер учаскелері жеке меншікке және уақытша жер пайдалануға берілмейді", - деп толықтырды министрлікте.

Ведомство ҚР Жер кодексінің 24-бабына сәйкес шетелдіктер, азаматтығы жоқ адамдар, шетелдік заңды тұлғалар, Қазақстан Республикасының шетелдік қатысуы бар заңды тұлғалары, халықаралық ұйымдар, халықаралық қатысуы бар ғылыми орталықтар, сондай-ақ қандастар жеке меншік немесе жер пайдалану құқығында ауыл шаруашылығы мақсатындағы жер учаскелерін иелене алмайтынын нақтылайды.

"Кодекстің 171-бабына сәйкес шетелдіктерге, азаматтығы жоқ адамдарға, шетелдік заңды тұлғаларға, Қазақстан Республикасының шетелдік қатысуы бар заңды тұлғаларына, Халықаралық ұйымдарға, халықаралық қатысуы бар ғылыми орталықтарға, сондай-ақ қандастарға жалдау шартымен 2016 жылғы 1 шілдеге дейін берілген ауыл шаруашылығы мақсатындағы жер учаскелеріне уақытша жер пайдалану құқығы мерзім аяқталғанға дейін қолданылады жалдау шартының қолданылуы жаңа мерзімге ұзартылмайды немесе Кодексте көзделген уақытша жер пайдалану құқығын тоқтату үшін өзге де негіздер басталғанға дейін қолданылады", - деп хабарлады ҚР Ауыл шаруашылығы министрлігі.