Қазақстанда туберкулездің алдын алу қағидаларына түзетулер енгізілді

Жаңа талаптарға сәйкес жасырын туберкулез инфекциясы ошағында байланысатын адамдарды анықтауды қоса алғанда, санитариялық-эпидемияға қарсы іс-шараларды ұйымдастыру мен жүргізуді аумақтық санэпидбақылау бөлімшесінің бейінді маманы алғашқы медициналық-санитариялық көмек көрсететін медициналық ұйымның (МСАК) фтизиатрымен бірлесіп жүзеге асыратын болады.

Кейіннен динамикалық бақылаумен байланыстағы адамдарды тексеруді учаскелік дәрігерлерді, жалпы практика дәрігерлерін, терапевтер мен педиатрларды қоса алғанда, МСАК мамандары, сондай-ақ фтизиатрлар жүргізетін болады.

Бұдан басқа, бұйрықпен денсаулық сақтаудың ақпараттық жүйелерінде профилактикалық емдеу нәтижелерін тіркеуге жаңа талаптар белгіленді. Енді нәтижелер келесі санаттар бойынша жазылады:

— "Емдеу аяқталды" - пациент емдеу курсынан сәтті өтті.

— "Тиімсіз емдеу" - профилактикалық емдеу кезінде туберкулез ауруы дамыды.

- "Өлім" - науқас емдеу кезінде қандай да бір себептермен қайтыс болды.

- "Препараттардың уытты әсеріне байланысты профилактикалық емдеуді тоқтату" -жағымсыз реакцияларға байланысты емдеу тоқтатылды.

— "Нәтиже бағаланбаған" -емделушінің басқа медициналық ұйымға ауысуына байланысты емдеу нәтижесі анықталмаған.