Қазақстанда жасанды интеллект қандай салаларға белсенді енгізілуде

Ол туралы цифрлық даму, инновациялар және аэроғарыш өнеркәсібі министрлігінің жасанды интеллект пен инновацияларды дамыту комитетінің төрағасы Ғиззат Байтұрсынов толығырақ айтып берді.

"Бұл акселерациялық бағдарлама экономиканың негізгі салаларына АИ-шешімдерді енгізуге бағытталған. Бағдарлама командаларды іріктеу мен оқытудан бастап салалық бағыттарда пилоттық жобаларды сүйемелдеу мен іске қосуға дейінгі барлық негізгі кезеңдерді қамтиды", — деп атап өтті ОКҚ баспасөз мәслихатында Ғиззат Байтұрсынов.

АИ-шешімдерді енгізу жөніндегі бағдарламаның бірінші кезеңі мынадай бағыттарды қамтыды:

• Тау - кен өнеркәсібі (Mining) — Индустрия және құрылыс министрлігі;
• Энергетика және мұнай өндіру (EnergyTech) — Энергетика министрлігі;
• Медициналық технологиялар (MedTech) — Денсаулық сақтау министрлігі;
• Қаржы технологиялары (FinTech) - "Астана" халықаралық қаржы орталығы (АХҚО);
• Мемлекеттік технологиялар (GovTech) — "Ұлттық ақпараттық технологиялар"АҚ.

Сондай-ақ, Министрлік өкілі акселерациялық бағдарламаның бірінші кезеңінің нәтижелерімен бөлісті.

"Біз қатысушы компаниялардан 116 өтінім алдық, олардың 32-сі іріктеуден өтіп, бағдарламаны сәтті аяқтады. Үш айдың ішінде әртүрлі салаларда 27 пилоттық жоба іске қосылды. Бұдан басқа, 4 жоба пилоттық режимде іске асырылды және өзінің тиімділігі мен масштабтау әлеуетін растады", — деді Г.Байтұрсынов.