Қазақстанда су қорғау аймақтарын анықтау жоспарлануда

Күн тәртібіндегі негізгі тармақтардың бірі су ресурстарының ақпараттық-талдау орталығының қызметіне шолу болды, ол бүгінгі күні су ресурстарының ұлттық ақпараттық жүйесін әзірлеуді іске асыруда. Кездесу барысында министр мен депутаттар жоба бойынша жұмыс барысымен танысты.

Министр хабарлағандай, қазіргі уақытта жүйеге Қазақстанның барлық аумағы бойынша 5000-нан астам су объектілері цифрландырылып, енгізілді. Деректер базасын толықтыру және өзектендіру бойынша жұмысты күн сайын "Қазсушар"РМК мамандары жалғастыруда. Болашақта бұл процесті толық автоматтандыруға көшу жоспарлануда, бұл су ресурстарын жедел басқаруға және объектілердің жай-күйін бақылауға мүмкіндік береді.

Су ресурстарының ұлттық ақпараттық жүйесін әзірлеу мемлекеттік бюджеттен қаражат тартпай жүзеге асырылады. Жобаны қаржыландыру Еуразиялық даму банкінің грантымен қамтамасыз етілген.

Сонымен қатар, БҰҰ Даму Бағдарламасымен бірлесіп, министрлік су қоймаларына су ағынын қысқа мерзімді және ұзақ мерзімді болжауға арналған неміс talsimng жүйесін енгізуде. Жоба аясында Есіл және Нұра өзендерінің бассейндері толығымен модельденген. Ағымдағы жылдың соңына дейін еліміздің барлық су ресурстарын цифрлық модельдеуді аяқтау жоспарлануда.

Отырыста сондай-ақ Қазақстанның су объектілерінде су қорғау аймақтары мен белдеулерін белгілеу мәселесі көтерілді. Бұл ауқымды жұмыс үш кезеңде жүргізіледі және 2027 жылға дейін аяқталуы тиіс. Бірінші кезеңде ірі су объектілеріндегі, содан кейін орта және кіші су қорғау аймақтарының шекаралары айқындалатын болады.

Мұндай шаралар экологиялық қауіпсіздікті қамтамасыз етуге, су айдындарының ластануын болдырмауға және елді мекендер, ауыл шаруашылығы және өнеркәсіп объектілері маңында су ресурстарын пайдалануды неғұрлым тиімді реттеуге бағытталған.

Кездесуге қатысушылар Балқаш көлін сақтау мәселесіне ерекше назар аударды. Өткен жылы су және ирригация министрлігі Француз даму агенттігімен келісімге қол қойды, оған сәйкес француз тарапы көл бассейнін жан-жақты зерттейді.

Жиналған деректер негізінде 2040 жылға дейін Балқашты сақтау және орнықты басқару жөніндегі ұзақ мерзімді мастер-жоспар дайындалатын болады. Қазіргі уақытта француз сарапшыларымен ақпарат жинау және белсенді деректер алмасу жалғасуда.

Мәжіліс депутаттары Министрге және ақпараттық-талдау орталығының өкілдеріне кең ауқымды сұрақтар қойды. Бейінді кадрларды даярлау, құрғақшылықты болжау әдістері, ауыл шаруашылығындағы суды есепке алу, қайта сумен жабдықтау технологияларын енгізу, сондай-ақ су айдындарының маңында пайдалы қазбаларды өндіру мәселелері талқыланды.

Министр депутаттарға қатысқаны және белсенді жұмыс істегені үшін ризашылығын білдірді:

"Мәжіліс депутаттарына жаңа Су кодексін және ілеспе заң жобаларын әзірлеуге белсенді қатысқаны үшін көп рахмет. Біздің бірлескен жұмысымыз мұнымен аяқталмайды. Құжат 10 маусымда күшіне енеді және Біз жаңа су заңнамасында қойылған міндеттердің тиімді іске асырылуын қамтамасыз етуіміз керек", — деп атап өтті Нұржан Нұржігітов.