Қазақстанда дәрілік препараттарды таңбалау қалай өтеді

"Нормативтік-құқықтық база дайындалды, сондай-ақ таңбалаудың бизнес-процестері сыналды. Яғни, пилоттық жобада қатысушыларды тіркеу, дәрілік заттарды ұлттық каталогта тіркеу, таңбалау кодтарының эмиссиясы, таңбалау кодтарын тікелей ел өндірістеріне енгізу, дәрілік заттарды бір меншік иесінен екіншісіне беру, оларды айналымнан шығару процестері қамтылды", - делінген денсаулық сақтау министрлігінің жауабында.

Ведомствоның хабарлауынша, жобаға отандық және шетелдік өндірушілер, "СК-Фармация" ЖШС, дистрибьюторлар, медициналық ұйымдар — барлығы 23 ұйым қатысты.

Пилоттық бағдарлама өндірушіден бастап Медициналық және дәріхана мекемелеріндегі айналымнан шығаруға дейінгі дәрілік заттың қаптамасына салынған DataMatrix коды арқылы бақылау процесін тексерді.

"Дәрілік заттарды цифрлық таңбалау және қадағалау жүйесі препараттардың айналымын анағұрлым айқын етеді және контрафактілік өнімдерден қорғаудың негізгі құралдарының бірі болып табылады. POS терминалдарын пайдаланып кодтарды сканерлеуге болады. Дәрілік препараттың әрбір қаптамасында бірегей Data Matrix сандық кодтары бар. Бұл сатып алынған препараттың түпнұсқалығын тексеруге мүмкіндік береді. Қазіргі уақытта тауарларды таңбалау мен қадағалаудың ақпараттық жүйесінде 19 отандық тауар өндіруші, 276 көтерме сауда субъектісі, 3 172 бөлшек сауда субъектісі және МӘМС және ТМККК шеңберінде қызметін жүзеге асыратын 19 001 медициналық мекеме тіркелген", — делінген жауапта.