Легионерлерге тыйым салу және ұлттық спортқа бәс тігу: Тоқаев жаңа заңға қол қойды

Заң дене шынықтыру мен спортты дамыту саласындағы мемлекеттік саясатты жетілдіруге бағытталған.

Уәкілетті орган басым спорт түрлерінің республикалық және өңірлік тізбелерін әзірлейді, жоғары жетістіктер спорт түрлерінің тізбесін, сондай-ақ оларды бюджет қаражаты есебінен қаржыландыру тәртібін айқындайтын болады.

Басым спорт түрлері халықаралық аренада қол жеткізілген нәтижелер бойынша бекітілетін болады. Бұл Олимпиада, Паралимпиада, Сурдлимпиада, Азия және Паразия ойындарының бағдарламасына кіретін спорт түрлері, сондай-ақ ұлттық спорт түрлері.

Ұлттық және жергілікті спорт федерацияларына бөлінетін спорт федерацияларын аккредиттеу бөлігіндегі ережелер жетілдірілді.

Шетелдік легионерлерді бюджет қаражаты есебінен және квазимемлекеттік сектор субъектілерінің қаражаты есебінен қаржыландыруға тыйым салу белгіленді.

Бұдан былай бюджет қаражаты есебінен төрт бағыт бойынша қаржыландыру жүзеге асырылатын болады: Жоғары жетістіктер спорты, оның ішінде спорттың басым түрлері, мемлекеттік дене шынықтыру-спорт ұйымдарының жұмыс істеуі, бұқаралық спорт, спорттық инфрақұрылымды дамыту.

Дәстүрлі құндылықтар мен патриоттық тәрбиені күшейту жөніндегі шараларды көздейтін спортшыларды даярлаудың бірыңғай стандарттары әзірленді. "Спорттық дайындықтың ұлттық стандарттары"ұғымы енгізілді.

Уәкілетті органға допингке қарсы ережелерді бұзғаны үшін шаралар қабылдау жөніндегі өкілеттіктер беріледі.

Заңның мәтіні баспасөзде жарияланады.