Қазақстан Үкіметі фермерлерді қолдау үшін 40 млрд теңге бөлді

"Қаражатты көктемгі егіс жұмыстарын сапалы жүргізуді қамтамасыз ету, 2025 жылғы егінді қабылдау үшін элеваторлық сыйымдылықтарды босату, қазақстандық астық экспортының бәсекеге қабілеттілігін арттыру, сондай-ақ жаңа өткізу нарықтарын игеру сияқты міндеттер кешенін шешуге бағыттау жоспарлануда", – делінген хабарламада.

2024 жылы елімізде 25,2 млн тонна көлемінде дәнді дақылдардың рекордтық өнімі жиналды. Жоғары өнімділікке агротехнологияларды дұрыс қолдану нәтижесінде және қолайлы ауа-райының арқасында қол жеткізілді, деп атап өтті Үкімет.
Сонымен қатар, ішкі нарықтың қажеттілігі шамамен 10 млн тоннаны құрайды.

"Қасым-Жомарт Тоқаев 2024 жылы ауыл шаруашылығы қызметкерлерінің бірінші форумында атап өткендей, Қазақстанның дәнді дақылдар бойынша экспорттық әлеуеті 12 млн тоннаны құрайды – бұл үлкен көлем және үлкен жауапкершілік. Үкіметтің басым міндеті – фермерлерге өз өнімдерін шетелдік нарықтарда өткізуде жан-жақты қолдау көрсету", - делінген мәтінде.

Осы экспорттық әлеуеттің 10 млн тоннасы дәстүрлі өткізу нарықтарына бағытталады, олар бойынша маршруттар пысықталған. Тағы 2 млн-алыс бағыттар мен жаңа нарықтар бойынша іске асыруға. Осылайша, тасымалдау шығындарының құнын арзандатуды субсидиялау фермерлерге астықты жаңа нарықтарға уақтылы экспорттауға және элеваторларды жаңа егінге дайындауға мүмкіндік береді.
Соңғы мәліметтер бойынша, 2024 жылдың қыркүйегінен осы жылдың сәуіріне дейін астық экспорты 6,9 млн тоннаны құрады немесе 2023-2024 жылдың сәйкес кезеңінен 54% - ға артық. 

Экспорттың дәстүрлі бағыттары Өзбекстан, Тәжікстан, Қырғызстан, Ауғанстан болып табылады.  Иран мен Әзірбайжанға жеткізілім ұлғайды. Транзиттік жолдар Ресей, Латвия, Литва, Эстония, Әзірбайжан, Грузия, Түркіменстан және Қытай аумақтары арқылы өтеді.