Министр Қазақстанда туризмнің дамуын тежейтін бірқатар проблемаларды атады

Оларды шешу үшін заңнамаға өзгерістер енгізіледі. Мәселен, облыс әкімдіктеріне елді мекендерден тыс жерлерде, оның ішінде ұлттық парктер аумағында туристік инфрақұрылым салу бойынша өкілеттіктер беру ұсынылады.

"Мұндай қадам негізгі туристік бағыттардың инфрақұрылымын дамытуды қамтамасыз етеді", - деді министр.

Сонымен қатар, оның айтуынша, туристік дестинацияларда инфрақұрылым құрылысын қаржыландыруға бағытталған Жеке бюджеттік бағдарлама әзірленетін болады. Сондай-ақ, ведомство өңірлерде жекелеген туризм басқармаларын құру мәселесін қарастыру қажет деп санайды. Қазір тек бес өңірде жеке басқарма бар, тағы екі өңір пысықталуда.

Министр сонымен қатар ведомство фермерлерге өз учаскелерінде агротуризммен айналысу құқығын беруді жоспарлап отырғанын айтты.

Ербол Мырзабосынов ұлттық парктерде жалдау мерзімін 49 жылға дейін ұлғайту бойынша заңнамалық жұмыстар жүргізіліп жатқанын хабарлады.

"Бұл экотуризмді дамыту үшін инвестициялар тартуға және инфрақұрылымды дамытуға мүмкіндік береді", - деп есептейді министр.

Сондай-ақ, оның айтуынша, қонақ үй сервисінің сапасын арттыру мақсатында қонақүйлерді жіктеу жүйесін реформалау жоспарлануда. Қолданыстағы критерийлер 2008 жылдан бері өзгерген жоқ және қазіргі халықаралық стандарттарға сәйкес келмейді.

"Ұйымдастырылған туристік топтардың қозғалысын жеңілдету үшін шекаралық өткізу пункттерінде жасыл дәліз режимі енгізіледі. Қазіргі уақытта бұл механизм Ресей мен Қырғызстан шекарасында пилоттық режимде жұмыс істеуде", - деп қорытындылады министр.