БЖЗҚ-дан қанша қаражат ТКШ мен энергия объектілерін жаңғыртуға жұмсалады

Ұлттық банктің хабарлауынша, БЖЗҚ қаражатын ұлттық жобаға тарту "Бәйтерек "ҰБХ" АҚ болып табылатын қаржы операторының облигацияларын сатып алу арқылы нарықтық шарттарда ғана мүмкін болады.

"Бұл эмитент Қазақстанның егеменді рейтингтері деңгейінде халықаралық рейтингтік агенттіктерден жоғары кредиттік бағалары бар сенімді қарыз алушы болып табылады", — деп атап өтті қаржы реттеушісінде.

Облигациялар Қазақстан қор биржасында орналастырылатын болады. Оларды сатып алуға барлық мүдделі инвесторлар қатыса алады. Облигациялардың өтеу мерзімі, сондай-ақ жылына кемінде 1 рет төленетін купондық сыйақысы болады.

"Осы бағыт бойынша БЖЗҚ қаражатын инвестициялаудың жалпы көлемі еркін өтімділіктің болуына байланысты болады", — деп хабарлады Ұлттық Банк.

Салымшылар үшін зейнетақы активтерін инвестициялау тек қана қайтарымды негізде нарықтық ставкалар бойынша жүзеге асырылатыны атап өтілді.

"Нарықтық принциптер эмитенттердің қаражатты пайдалану жөніндегі түпкі мақсаттарына қарамастан әрқашан сақталады. Тұтастай алғанда, мұндай тәсіл ұзақ мерзімді кезеңде нақты табыстылықты және салымшылардың зейнетақы жинақтарының сақталуын қамтамасыз ету жөніндегі ұзақ мерзімді мақсаттарға сәйкес келеді. Бұл ретте салымшылардың зейнетақы жинақтарына тұрақты инвестициялық табыс алу ғана емес, сонымен қатар елдің әлеуметтік-экономикалық дамуы да қамтамасыз етіледі", - делінген Ұлттық банктің хабарламасында.

Естеріңізге сала кетейік, бұған дейін Қазақстан энергетика және коммуналдық секторды жаңғыртудың 2025-2029 жылдарға арналған жоспарын бекітті. Ұлттық жобаны іске асыруға барлығы 13,5 трлн теңге бөлінді. Бұл туралы Қазақстан Үкіметінің 2024 жылғы 25 желтоқсандағы қаулысында айтылған. Ұлттық жобаның мақсаты-халыққа коммуналдық қызметтерді сенімді және сапалы ұсынуды және ел экономикасының орнықты дамуын қамтамасыз ету үшін республикадағы энергетикалық және коммуналдық инфрақұрылымды (желілер мен объектілерді) жаңғырту.