Қазақстандықтардан тас жолдарға қоқыс тастамауды сұрайды

"Қазавтожол" ақпараты бойынша, жыл бойы жол қызметтері Республикалық маңызы бар автомобиль жолдарын, сондай – ақ іргелес аумақтарды-жол жиектерін, бөлу жолақтарын, демалыс алаңдары мен автопавильондарды тазарту бойынша ауқымды жұмыс жүргізді. Барлығы 700 мың тоннаға жуық қоқыс жиналып, шығарылды, бұл күн сайын шамамен 2500 тонна қалдықты құрайды. Тазартылған аумақтардың жалпы ауданы шамамен 400 миллион шаршы метрге жетті.

"Бұл орасан зор жұмыс Жол қозғалысы қауіпсіздігін, жүргізушілер мен жолаушылардың жайлылығын қамтамасыз етуге, сондай-ақ өңірлердегі экологиялық жағдайды жақсартуға бағытталған. Көліктен лақтырылған немесе жол бойында қалған әрбір зат жол қызметтеріне жүктемені арттыратынын және қоршаған ортаға зиян келтіретінін түсіну маңызды", - делінген хабарламада.

Азаматтардың қоршаған ортаға жауапкершілікпен қарауы жолдардағы тазалық пен тәртіпті сақтауға ықпал етеді.

Қазақстандықтардан қоқысты осы мақсатқа арналмаған жерлерге тастамауды және қоршаған табиғатқа ұқыпты қарауды сұрайды.