Қазынашылық органдары бюджет есебінен жолдарды реконструкциялауды бақылауға алады

Аудиторлар бюджет есебінен автожолдарды реконструкциялау жөніндегі жобаларға қазынашылық сүйемелдеу қолданылмайтынын анықтады.

Сонымен бірге, бақылаудың бұл нысаны алаяқтық, сыбайлас жемқорлық және мемлекет қаражатын мақсатсыз пайдалану тәуекелдерін азайтады, жобалардың бұзылу ықтималдығын азайтады және жұмыстардың қатаң бекітілген қаржыландыру шеңберінде орындалуын қамтамасыз етуге мүмкіндік береді.

Осыған байланысты Қазынашылық комитетіне осы олқылықты жою туралы тапсырма берілді.

"Бүгінгі күні қабылданған шаралардың нәтижесінде автожолдарды реконструкциялауға байланысты Бюджеттік инвестициялық жобаларды іске асыру жөніндегі шарттар қазынашылық сүйемелдеу шарттарымен аумақтық қазынашылық органдарында тіркелуге жатады. Бұл ақпарат орындау үшін барлық өңірлерге жеткізілді", - делінген хабарламада.

Бұдан басқа, Комитетке аумақтық бөлімшелердің жұмысындағы кемшіліктерге талдау жүргізу және оларды болдырмау үшін қажетті шаралар қабылдау тапсырылды.

Нәтижесінде барлық ТОК басқарушы құрамының қатысуымен Комитет алқасы өткізілді, онда мемлекеттік аудит қорытындылары қаралды және бюджет қаражатын басқарудың тиімділігін арттыру бойынша нақты тапсырмалар берілді.