Ғимараттар мен құрылыс материалдарының отқа төзімділігіне қойылатын талаптар белгіленді

Атап айтқанда, техрегламент жаңа тармақпен толықтырылды:

- Отқа төзімділік шегіне қойылатын талаптар "өрт қауіпсіздігіне қойылатын жалпы талаптар" техникалық регламентімен регламенттелген.

Мәселен, өрт қауіптілігі класы және құрылыс бұйымдарының (оның ішінде темірбетон бұйымдарының) отқа төзімділік шектері стандарттау жөніндегі құжатта немесе құрылыс конструкциялары мен бұйымдарына арналған үлгілік жобалық шешімдерде белгіленген талаптарға (олар стандарттау жөніндегі құжаттарда болмаған жағдайда) сәйкес келуі тиіс делінген.

Отқа төзімділік шегін растау (айқындау) үшін заттай (оттық) сынақтар немесе есептеу-талдау әдістері жаңа құрылыс бұйымдарына қатысты оны өндіріске қою кезінде, сондай-ақ оларға конструктивтік өзгерістер енгізу кезінде жүргізілетіні көрсетіледі.

Жаңа өнім болып табылмайтын құрылыс бұйымдарына қатысты отқа төзімділік шегін Растауды есептеу-талдау әдісімен жүргізуге жол беріледі.

Атап өтілгендей, стандарттау бойынша өзара байланысты құжаттарды қолданбау Техникалық регламент талаптарын сақтамау ретінде қарастырылмайды.

"Қолдану нәтижесінде осы Техникалық регламенттің талаптарын ерікті негізде сақтау қамтамасыз етілетін стандарттау жөніндегі құжаттар қолданылмаған жағдайда сәйкестікті бағалау тәуекелдерді талдау негізінде жүзеге асырылады", - делінген құжатта.

Стандарттау жөніндегі халықаралық, өңірлік құжаттарды және шет мемлекеттердің стандарттау жөніндегі құжаттарын қолдануға жол беріледі.

Сондай-ақ, объектіні жобалау, сараптау, салу және кейінгі пайдалану процесінде терезе саңылаулары адамдардың кездейсоқ құлап кетуіне жол бермейтін құлыптармен немесе қауіпсіздік механизмдерімен қамтамасыз етілуі керек делінген.

Құжатта "жаңа құрылыс өнімдері" және "инновациялық құрылыс материалдары мен бұйымдары (өнімдері)"ұғымдары қосылды.

Міндетті сәйкестікті растауға жататын және сәйкестікті растаудан өтпеген өнімге сәйкестік белгісін қоюға жол берілмейді.

Бұдан басқа, жаңа редакцияда құрылыс объектісінің өмірлік циклінің кезеңіне және сенімділік сыныбына байланысты сәйкестікті растау мақсатында дәлелдемелер ретінде пайдаланылатын материалдар тізбесіне мынадай құжаттар енгізілетіні айтылған тармақ баяндалған:

- эскиз (эскиздік жоба);
- жобалық құжаттама (сызбалар, кестелер, есептеулер, түсіндірмелер) ;
- сараптамалық қорытындылар;
- атқарушылық техникалық құжаттама (сынау және өлшеу нәтижелері, жұмыс журналдары, қолданылатын құрылыс материалдарына сертификаттар, - бұйымдар мен конструкциялар, жасырын жұмыстарды куәландыру актілері, жауапты конструкцияларды аралық қабылдау актілері, іске қосу-баптау жұмыстарының актілері);
- авторлық және техникалық қадағалау қорытындылары;
- мердігердің сәйкестігі туралы декларация;
- объектіні пайдалануға қабылдау актісі;
- техникалық паспорт, пайдалану паспорты, ғимараттар мен құрылыстарды пайдалану жөніндегі техникалық журнал;
- тіркеу және рұқсат беру құжаттамасы.

Бұйрық 12 сәуірден бастап қолданысқа енгізіледі.