Қазақстан туризміне "жасыл" технологиялар енгізіледі

Бұл ұсынысты Премьер-Министр Олжас Бектенов қолдап, инвестициялық штаб отырысында қарады.

Депутаттық сауал нәтижесінде мүдделі мемлекеттік органдар мен бизнес-қоғамдастық өкілдерінің қатысуымен жұмыс тобы құрылды. Отырыс барысында отандық курорттарды баламалы инфрақұрылыммен қамтамасыз ету жөніндегі материалдар егжей-тегжейлі қаралып, зерделенді.

2024 жылғы 3 желтоқсанда Сенатта туризмді дамыту, инвесторларды тарту және Ақкөл қаласындағы туристік объектілер үшін инфрақұрылымның баламалы көздерін құру мәселелері бойынша отырыс өтті. Отырыс қорытындысы бойынша заңнамалық актілерге туризм саласындағы "жасыл" технологияларды пайдалануға байланысты нормаларды енгізу жолдары айқындалды. Бұдан басқа, мәселе Қазақстан Республикасы Парламенті Сенатының жобалық кеңсесінің отырыстары шеңберінде егжей-тегжейлі талқыланды.

Нәтижесінде 2025 жылғы 13 наурызда Үкіметтің № 141 қаулысымен туризм саласындағы мемлекеттік инфрақұрылымдық қолдауды жетілдіруді көздейтін түзетулер қабылданды.

Бұрын туристік нысандарды инфрақұрылымдық қамтамасыз ету ұзақ мерзімді құрылыс жұмыстарын қажет ететін және қоршаған ортаға әсер ететін дәстүрлі әдістерге негізделген. Енді инвесторларға балама "жасыл" тәсіл қол жетімді, электр желілерін салудың орнына — күн панельдері мен жел генераторларын орнату, орталықтандырылған канализацияның орнына — биосептиктерді пайдалану және жылыту үшін жылу сорғыларын орнату. Бұл шешімдер экожүйеге жүктемені айтарлықтай азайтады және курорттарға жыл бойы жұмыс істеуге мүмкіндік береді.