Қазақстандық спорт қандай өзгерістерді күтуде

Депутат Әсем Рахметова атап өткендей, заң дене шынықтыру және спорт саласындағы заңнаманы одан әрі жетілдіру, сондай-ақ әкімшілік реформаның 2 кезеңін іске асыру шеңберінде орталық және жергілікті атқарушы органдар арасындағы құзыреттерді ажырату мақсатында әзірленген.

Заң 2 Кодекске, 5 заңға түзетулер енгізді, олар келесі жаңалықтарды қамтиды:

• спорттың басым түрлерін олардың рейтингі негізінде емес, Ұлттық құрама командалардың Олимпиадалық, паралимпиадалық, сурдлимпиадалық, Азиялық және Параазиялық ойындарда өнер көрсету нәтижелері бойынша қалыптастыру;
• республикалық және өңірлік спорт федерацияларын ұлттық спорт федерацияларына айналдыру;
• жоғары жетістіктер спортына жататын басым спорт түрлерін бірінші кезектегі тәртіппен қаржыландыруды жүзеге асыру;
• спорттың ойын түрлері бойынша кәсіби спорт клубтарын ұстауға лимиттер белгілеу;
• легионерлерді бюджет қаражаты есебінен қаржыландыруға тыйым салу;
• спорт федерацияларын аккредиттеуге қойылатын талаптарды белгілеу;
• аккредиттелген спорт федерацияларына діни экстремизм мен терроризмнің алдын алу бойынша шаралар қабылдау міндетін белгілеу;
• бірыңғай оператордың қаражатына спорттық инфрақұрылым объектілерін салу мүмкіндігін беру.

Сондай-ақ спорттық іс-шараларға жіберу кезінде бірінші топтағы мүгедектігі бар спортшыны алып жүретін адамның шығыстарын өтеу жөніндегі заңнамалық талап белгіленді.

Сонымен қатар, спорттық медицинаны дамытуға бағытталған нормалар қарастырылған. Мемлекеттік кәсіпорын нысанында ұлттық спорттық медицина және оңалту ұйымын құру ұсынылады.

Сондай-ақ, заңмен спортшылар мен жаттықтырушыларға Мемлекеттік әлеуметтік қолдау көрсету тәртібіне өзгерістер енгізілді. Бұл ретте олар Олимпиада, Паралимпиада, Сурдлимпиада ойындарының чемпиондары мен жүлдегерлері және (немесе) олимпиадалық спорт түрлері бойынша Әлем чемпиондары атағын жеңіп алған, ел аумағында кемінде 20 жыл спорт саласында жұмыс өтілі бар Қазақстан азаматтары болуы тиіс.