Қауіпсіздік Кеңесінің отырысын Тоқаев өткізді: онда не талқыланды

Ақорданың ақпараты бойынша, отырыста Ұлттық қауіпсіздік стратегиясын іске асыру үшін қабылданған Ұлттық қауіпсіздік тәуекелдерін басқару жөніндегі 2021-2025 жылдарға арналған іс-қимыл жоспарының 2024 жылы орындалу қорытындылары қаралды.

"Үкімет, бірқатар бейінді мемлекеттік органдардың басшылары негізгі көрсеткіштерге қол жеткізу бойынша ақпарат ұсынды. Бұдан әрі пысықтауды талап ететін мәселелер, оның ішінде қоғамдық, экономикалық, экологиялық, ақпараттық қауіпсіздік бағыттары бойынша мәселелер талқыланды", – делінген хабарламада.

Президент Ұлттық қауіпсіздік стратегиясын іске асыру қоғам үшін маңызды НАҚТЫ НӘТИЖЕЛЕР БОЙЫНША бағалануы тиіс екенін атап өтті. Бұл ретте барлық салалардың дамуы азаматтар мен тұтастай алғанда мемлекеттің қауіпсіздік факторын ескеруі тиіс.

Сондай-ақ, отырыс барысында Терроризм мен экстремизмге қарсы іс-қимылдың өзекті мәселелері қаралды.

"Ұлттық қауіпсіздік комитетінің төрағасы Ермек Сағымбаевтың террористік және экстремистік көріністердің тәуекелдерін азайту, терроризмге қарсы қорғауды нығайту бойынша қабылданып жатқан шаралар туралы ақпараты тыңдалды", – делінген ақпаратта.

Отырыс қорытындысы бойынша мемлекеттік органдарға нақты тапсырмалар берілді.